დავით დეფი: „უსულო საგნები ხართ... ბიძინა ივანიშვილის შუშის სარკოფაგში“

პოლიტიკა - 19:14, 06 Jul, 2014

5672

„თქვენ საშიში ხართ არაკულტივირების და ასეთი მუქარის გამო“, - ამ სიტყვებით დავით დეფი საქართველოს კულტურის მინისტრის მოადგილის ალექსანდრე მარგიშვილის იმ განცხადებას ეხმაურება, რომელმაც ბევრის აღშფოთება გამოიწვია. განცხადება კი ამგვარი გახლდათ: „ეს მოფერებად მოგეჩვენებათ, როდესაც მორატორიუმი დასრულდება და მართლმსაჯულების მანქანა ამოიქოქება ახალი საწვავით. უგულავა ვის გაგახსენდებათ?!”
მართლმსაჯულების მანქანის ამოქოქვამდე დავით დეფი სპეციალური განცხადებით საქართველოს პრეზიდენტს, პრემიერ მინისტრსა და კულტურის მინისტრს მიმართავს. პოეტი, „ბიძინა ივანიშვილის შუშის სარკოფაგში გამომწყვდეულ“ სახელმწიფო მოხელეებს ურჩევს გონს მოეგონ...
დავით დეფი: „ბატონებო: საქართველოს პრეზიდენტო, პრემიერ მინისტრო, კულტურის მინისტრო... უფრო თქვენ მოგმართავთ კულტურის მინისტრო, რადგან ეს პიროვნება უშუალოდ თქვენი მოადგილეა და გეტყვით პირდაპირ - გვაშინებთ? გვემუქრებით? კულტურის სამინსტრო ემუქრება საზოგადოებას? პიროვნებას? თავიდან მე უუნაროები და უმწეოები მეგონეთ, შემდეგ დავინახე როგორი უტიფარი, როგორი საბჭოური მენტალიტეტისანი ხართ, შემდეგ კი თქვენი საქმეებიდან გამომდინარე, ბოლომდე დავრწმუნდი თქვენს სრულ არაკომპეტენტურობაში, უზნეობასა და უსირცხვილობაში.
იმ წამიდან, როცა ასევე თქვენმა მოადგილე ბერიკაშვილმა წინასაარჩევნო სიყალბითა და პათეტიკით, ბავშვის სიკვდილი, ღია ეთერში კონკრეტულ ადამინს დააბრალა, თქვენ არაკულტივირებულები გახდით. ასე დაკომპლექსებული და მხდალი ადამიანები იქცევიან, მაგრამ ახლა უკვე, თქვენი მოადგილის ამ კონკრეტული განცხადებით, თავმომწონედ ქადაგებთ სიბოროტეს.
საერთოდ გესმით რას აკეთებთ? აცნობიერებთ სახელმწიფო როგორ დააკნინეთ და პიროვნებას ებრძვით? ვფიქრობ გესმით და ეს ყველაფერი მე, როგორც ქვეყნის მოქალაქეს, უკვე ასეთ გარემოში ცხოვრებისა და საქმიანობის პრობლემას მიქმნის. თქვენ უკვე საშიში ხართ საქართველოსთვის. განა დიდი სიბოროტის გამო, ბოღმისა და სრული შეუმდგარობის გამო, არა, თქვენ საშიში ხართ არაკულტივირების გამო. ასეთი მუქარის გამო.
მტყუანს და მართალს დრო და სასამართლო აჩვენებს, მაგრამ თქვენ რას იზამთ, როცა უსირცხვილო, მხდალი, დაკომპლექსებული, დაბოღმილი და საბჭოთა ხელისუფლების სახელით დარჩებით ისტორიაში? იტყვით რა მექნა, ვერაფერს ვიზამდი, მე სხვანაირად არ შემეძლოო? ასეთ რაღაცეებში ვერ ვერკვეოდიო?
იყო უტვინო, უზნეო, უწიგნური, უსირცხვილო, უტიფარი, უგემოვნო, უნიათო, უუნარო, უნამუსო ეს ერთია, მაგრამ ძალიან საშიშია იყო უგულო. თქვენ ყველაფერთან ერთად უკვე არა თუ უგულო, არამედ უსულო საგნები ხართ, თქვენზე უფრო საშინელი და სამარცხვინო პიროვნების, ბიძინა ივანიშვილის შუშის სარკოფაგში“.