ლომჯარია: უგულავასთვის ბრალის წაყენება არ იყო გადაუდებელი აუცილებლობა

პოლიტიკა - 22:38, 04 Jul, 2014

867

„სამართლიანი არჩევნების“ აღმასრულებელი დირექტორი ნინო ლომჯარია აცხადებს, რომ წინასაარჩევნო პერიოდში გამოცხადებული მორატორიუმის პირობებში დარღვევის ნიშნები იკვეთება.

ამის შესახებ ნინო ლომჯარიამ ტელეკომპანია „იმედის“ ეთერში, გადაცემა „რეაქციაში“ სტუმრობისას ისაუბრა.

"მორატორიუმის დარღვევის ნიშნები ნამდვილად ჩანს, გამომდინარე იქიდან, რომ ვფიქრობთ, სათანადოდ არ არის დადასტურებული, რა გადაუდებელი აუცილებლობიდან გამომდინარეობდა ბრალის წარდგენა. განსაკუთრებით მარნეულის ინციდენტთან დაკავშირებით ბრალის დამატებით აშკარაა, რომ გადაუდებელ აუცილებლობას არ წარმოადგენდა ეს. საკმაოდ მძიმე ბრალი არის შეფარდებილი ამ ნაწილში და თუ გადავხედავთ წინასაარჩევნო პერიოდს, საკმაოდ მძიმე შემთხვევები იყო ცემა, ფიზიკური ანგარიშსწორება, გაყალბების მცდელობა და ა.შ. მაგრამ ამ პირების მიმართ წარდგენილი ბრალი არ იყო ხოლმე ასეთი მძიმე და ზოგადად, სამართალდამცავი ორგანოები ლოიალურები იყვნენ“, - განაცხადა ლომჯარიამ.

ლომჯარია მიიჩნევს, რომ ქვეყნის ინტერესებიდან გამომდინარე, უგულავას საქმე ისე უნდა იყოს წარმართული, რომ აღნიშნულ საქმეებთან დაკავშირებით არც ერთი კითხვა არ დარჩეს პასუხგაუცემელი.