ასოცირების ხელშეკრულების გაფორმება ბულგარეთში აღნიშნეს

პოლიტიკა - 21:04, 04 Jul, 2014

1474

ბულგარეთში ასოცირების ხელშეკრულების ხელმოწერასთან დაკავშირებით სამი ქვეყნის - საქართველოს, მოლდოვასა და უკრაინის საელჩოების ინიციატივით ერთობლივი საზეიმო მიღება და სამი ქვეყნის ელჩების ბრიფინგი გაიმართა.
ბრიფინგს ევროკომისიის წარმომადგენელი ოგნიან ზლატევი უძღვებოდა. ღონისძიებაზე ევროპასთან ასოცირების შეთანხმების ხელმოწერის ისტორიულ მნიშვნელობას გაესვა ხაზი, ყურადღება საქართველოს მთავრობის მიერ გატარებულ წარმატებულ რეფორმებზეც გამახვილდა.
საზეიმო მიღებას ბულგარეთის სამთავრობო და დიპლომატიური კორპუსის, მათ შორის ევროკავშირის ყველა ქვეყნის, აშშ-ს, თურქეთის, სერბეთის, ალბანეთის ელჩები და არასამთავრობო სექტორისა და მასმედიის წარმომადგენლები დაესწრნენ.
ბულგარეთის საგარეო საქმეთა მინისტრ კრისტიან ვიგენინმა საჯაროდ მიულოცა ქვეყნებს ასოცირების ხელშეკრულების ხელმოწერა.
"ბულგარეთი მიესალმება უკრაინის, მოლდოვასა და საქართველოს ევროკავშირთან ასოცირების შესახებ შეთანხმების ხელმოწერას. ვთვლით, რომ ეს არის ისტორიული დღე, არა მხოლოდ ევროკავშირისა და ამ სამი ქვეყნისათვის, არამედ მთელი ევროპისათვის. ჩვენ გვწამს, რომ ასოცირების შესახებ შეთანხმების ხელმოწერით, საქართველო, მოლდოვა და უკრაინა განვითარების ევროპულ პერსპექტივას მიიღებენ. ჩვენ ვულოცავთ სამი ქვეყნის მოქალაქეებსა და მთავრობებს, რომლებმაც წარმატებული მოლაპარაკებები აწარმოეს და გაატარეს რეფორმები ხელშეკრულების ხელმოწერისთვის. ამ ქვეყნებს დიდი სამუშაო აქვთ ჩასატარებელი ხელშეკრულების დანართების იმპლემენტაციისთვის. ბულგარეთი კი მზად არის ამ ქვეყნებს დახმარება გაუწიოს აღნიშნულ საქმეში. დარწმუნებულნი ვართ, რომ ხელშეკრულება დამატებით იმპულსს მისცემს ბულგარეთსა და აღნიშნულ ქვეყნებს შორის ორმხრივი ურთიერთობების გაღრმავებას", - განაცხადა მისალოც მიმართვაში ბულგარეთის საგარეო საქმეთა მინისტრმა.