გელბახიანი: დაიჭიროს თავისი ხალხიც, ზოგიერთი ,,მუქთახორა“ მინისტრი, ნაცარქექიები...

პოლიტიკა - 20:43, 04 Jul, 2014

2190

გიგი უგულავას დაკავებაზე საუბრობს იურისტი, ბადრი პატარკაციშვილის ყოფილი პოლიტიკური პარტნიორი ვალერი გელბახიანი ,,ალიასთან“ ინტერვიუში. გელბახიანი უგულავას შემდეგ გიგა ბოკერიას, გივი თარგამაძის და გია ბარამიძის დაჭერას პროგნოზირებს. რაც შეეხება სააკაშვილს, გელბახიანი მიიჩნევს, რომ ამის უფლებას არ მისცმენ, რადგან სააკაშვილი დღეს უკრაინაში სერიოზულ რეფორმებს ატარებს.

გელბახიანი მიიჩნევს, რომ გიგი უგულავას დაკავებას ქვეყნის შიგნით მასშტაბური არაფერი მოჰყვება. მისი აზრით, ეს გამოიწვევს "ნაციონალური მოძრაობის" გააქტიურებას, ისინი გააკეთებენ პატარა განცხადებებს, ხალხს ვერ აიყოლიებენ, თუმცა უგულავას დაპატიმრებას გამოეხმაურებიან დასავლეთის პოლიტიკური წრეები და მოსალოდნელია, რომ ამას დადებით კონტექსტში არ შეაფასებენ.

გელბახიანი მთავრობაში მყოფ ზოგიერთ პირს ,,მუქთახორას“ და ,,ნაცარქექიას“ უწოდებს. ის თვლის, რომ ხელისუფლებამ მათაც უნდა აგებინოს პასუხი:

,,თუ მისმა ჩინოვნიკებმა ორი წლის მანძილზე ვერაფერი გააკეთეს და დააშავეს, მარტო "ნაციონალების" დაჭერა საქმეს არ უშველის, დაიჭიროს თავისი ხალხი, აჩვენოს მოსახლეობას, რომ ქვეყანაში შერჩევით სამართალს ადგილი არ აქვს. რახან "ოცნებაა", მისი დანაშაული გმირობაა?.. დანაშაული ყველგან დანაშაულია, ზოგიერთი მუქთახორა მინისტრი რომ უზის, მარტო იმიტომ უნდა დაიჭირო, რომ არაფერს აკეთებენ. უსაქმური ნაცარქექიები, ხომ ხედავთ, რომ არაფერი კეთდება. წესით, მთავრობაში უნდა არსებობდეს სპეციალური კომისია, რომელმაც უნდა მოიპოვოს ინფორმაცია, გადაამუშაოს, ვინ რას აკეთებს აღმასრულებელ გუნდში“, - აცხადებს გელბახიანი ,,ალიასთან“ საუბარში.