საქართველოს ექს-პრეზიდენტი მიხეილ სააკაშვილი სტრასბურგის სასამართლოს გადაწყვეტილებას ეხმაურება. სააკაშვილის თქმით, ეს არის სამართლებრივი და პოლიტიკური გამარჯვება. როგორც ექს-პრეზიდენტი აცხადებს, თავის დროზე წინა ხელისუფლებამ ყველაფერი გააკეთა, რომ სტრასბურგის სასამართლოს გადაწყვეტილება საქართველოს სასარგებლოდ გამოეტანა.

„ეს არის საქართველოს სამართლებრივი და პოლიტიკური გამარჯვება. ჩვენ ეს სარჩელი შევიტანეთ 2007 წლის მარტში საპასუხოდ იმისა, რომ რუსეთის ჯაშუშების დაკავების შემდეგ ქართველი მოქალაქეები გადმოყარეს. ამ წლების განმავლობაში რამდენჯერმე შევხვდი იურიდიულ გუნდს და 2012 წლის ივლისში სასამართლო გავიდა გადაწყვეტილების მისაღებად. ესე იგი ეს მოხდა ოქტომბრის არჩევნებამდე. ეს არის მთლიანად იმ იურიდიული გუნდის გამარჯვება, რომელიც მუშაობდა ამ საკითხზე. ერთი რაც არის საწყენი, რომ ჩვენი მაშინდელი ელჩი ევროსაბჭოში ზურაბ ჭიაბერაშვილი არჩევნების შემდეგ ახალმა მთავრობამ გაასამართლა. იურიდიული გუნდის მნიშვნელოვან ნაწილს, მათ შორის თინათინ ბურჯალიანს, რომელიც ნამდვილი გმირია ამ ყველაფრის, ისე შეუქმნეს საქმე, რომ თავის ქვეყანაში აღარ დაედგომებათ. ჩვენ ყველამ ერთად უნდა დავიცვათ საქართველოს ინტერესები და არ უნდა ვდევნიდეთ იმ ხალხს, რომელიც ჩვენი ქვეყნის ინტერესებს იცავს. ამ სარჩელთან დაკავშირებით ყველაფერი წინა მთავრობამ გააკეთა, ეხლა ახალ ხელისუფლებას ის დარჩენია, რომ რუსეთს დაეკისროს კომპენსაცია“, - განაცხადა სააკაშვილმა.