თავდაცვის მინისტრი ირაკლი ალასანია სტრასბურგის მიღებულ სასამართლოს გადაწყვეტილებას გამოეხმაურა, რომლის მიხედვით საქართველომ რუსეთს 7 წლიანი დავა მოუგო.

მისი თქმით, დამამცირებელ მოპყრობას ქართველი ხალხი არასდროს შეეგუება და სწორედ ეს იყო მთავარი მოტივაცია მრვალაწლიანი დავისა. ალასანია იმედოვნებს, რომ საქართველო-რუსეთის ურთიერთობებში მსგავსი ფაქტები აღარ განმეორდება.

“დღეს საქართველომ რუსეთს სამართლებრივი დავა მოუგო ევროპის სასამართლოში. საქართველოს სახელმწიფომ გამარჯვებით დაასრულა დავა, რომელიც ყველა ჩვენთაგანისთვის ღირსების საქმე იყო. დამამცირებელი და არაადამიანური მოპყრობა არის ის, რასაც არასდროს შეეგუება ქართველი ხალხი და არ დაუშვებს ცივილიზებული სამყარო. სწორედ ეს იყო მთავარი მოტივაცია საქართველოს მიერ სტრასბურგის ადამიანის უფლებათა ევროპულ სასამართლოში წარმოებული მრავალწლიანი სასამართლო დავისა. დღეს სამართალმა იზეიმა, დარწმუნებული ვარ, მალე ჩვენ მთავარ მიზანს მივაღწევთ და უფრო დიდ გამარჯვებას ვიზეიმებთ. ამავდროულად, ვიმედოვნებთ, რომ ამგვარი ფაქტები საქართველო-რუსეთის ურთიერთობაში არასოდეს განმეორდება”, - განაცხადა ირაკლი ალასანიამ.

სტრასბურგის სასამართლომ ცოტა ხნის წინ საქართველოს სასარგებლო გადაწყვეტილება გამოიტანა, რომლის მიხედვით რუსეთმა საქართველოს დაზარალებულ მოქალაქეებს კომპენსაცია უნდა გადაუხადოს. კომპენსაციის ოდენობა 12 თვის ვადაში მოლაპარაკებების გზით უნდა განისაზღვროს.