უჩა ნანუაშვილი: უგულავა თავს პოლიტიკური დევნის მსხვერპლად მიიჩნევს და ბრძოლას განაგრძობს

პოლიტიკა - 20:31, 03 Jul, 2014

1858

საქართველოს სახალხო დამცველმა მოდულის შენობაში გიგი უგალავასთან შეხვედრის დეტალებზე ისაუბრა. როგორც უჩა ნანუაშვილმა ჟურნალისტებს განუცხადა, ის უგულავას პირადად გაესაუბრა. მისი თქმით, ყოფილი მერი მოდულის შენობაში ჯერ არ დაუკითხვათ, ის თავს მხნედ გრძნობს და ბრძოლის გაგრძელებას აპირებს. ომბუდსმენის თქმით, უგულავამ მასთან საუბრისას აღნიშნა, რომ თავს პოლიტიკური დევნის მსხვერპლად მიიჩნევს და მის დაკავებას პოლიტიკას უკავშირებს.

უჩა ნანუაშვილი აპირებს უგულავას ადვოკატთან შეხვედრას და საქმის მასალების შესწავლას. ამასთან, სახალხო დამცველის წარმომადგენელი დაესწრება სასამართლოს სხდომას, რომელიც გიგი უგულავასთვის აღმკვეთი ღონისძიების შეფარდების საკითხზე იმსჯელებს.

"მოპყრობაზე და პირობებზე მას არანაირი საჩივარი და პრეტენზია არ აქვს. ამბობს, რომ არის ნორმალურ პირობებში, თუმცა ბრალდებებს უარყოფს. ჩვენ ვიწყებთ საქმის შესწავლას. ასევე შევხვდით მის ადვოკატს, რომელიც ცოტა ხნის წინ იმყოფებოდა იზოლატორში", - აღნიშნა სახალხო დამცველმა.

უჩა ნანუაშვილის ინფორმაციით, გიგი უგულავა ფინანსთა სამინისტროს საგამოძიებო ნაწილში რამდენიმე საათის განმავლობაში იმყოფებოდა. იქ მისი დაკითხვა არ მომხდარა და შესაბამისად, მასთან არც ადვოკატები ყოფილან შესული. მისივე ცნობით, უგულავა მოდულის შენობაში 09:00 საათიდან იმყოფება.