საგარეო საქმეთა მინისტრი მაია ფანჯიკიძე სტრასბურგის სასამართლოს გადაწყვეტილებას ეხმაურება.

მისი თქმით, ეს არის სამართლიანობის აღდგენა იმ ადამიანებისთვის, რომლებიც 2006 წელს მძიმე მდგომარეობაში ჩავარდნენ.

„2006 წელს, როდესაც რუსეთმა ემბარგო გამოაცხადა, ამის შემდეგ იყო ჩვენი მოქალაქეების ასე ვთქვათ, გამოსახლება, გამოძევება რუსეთიდან. ისინი სრულიად არაადამიანურ და ძალიან შეურაცხმყოფელ პირობებში გამოიყვანეს ქვეყნიდან და მე მახსოვს სატვირთო თვითმფრინავებით მათი ჩამოყვანა და ის საშინელი კადრები, რომელიც მაშინ ვიხილეთ. რასაკვირველია, ამ ყველაფერს პოლიტიკური სარჩული ჰქონდა. 2007 წელს საქართველომ შეიტანა სარჩელი სტრასბურგის სასამართლოში. ახლა დამთავრდა ეს პროცესი და რუსეთის ფედერაცია დადანაშაულებულ იქნა ევროპული კონვენციის მრავალი მუხლის დარღვევაში“, - განაცხადა მაია ფანჯიკიძემ.

რაც შეეხება ფულად კომპენსაციებს, ფანჯიკიძის თქმით, აღნიშნულ საკითხზე რუსეთისა და საქართველოს იუსტიციის სამინისტროებმა უნდა მოილაპარაკონ.

„ეს არის ძალიან სამართლიანი გადაწყვეტილება და მინდა, მივულოცო ყველას, ვინც ამ სარჩელის უკან იდგა და აღვნიშნო ისიც, რომ სამწუხაროდ, დღესაც ხდება ადამიანის უფლებების დარღვევა ოკუპირებულ ტერიტორიებზე, მაგრამ იმედი მაქვს, რომ ეს გადაწყვეტილება იქნება ერთგვარი გაფრთხილება რუსეთის ფედერაციისთვის, რომ სამართალი არსებობს და მინდა, იმედი გამოვთქვა, რომ მსგავსი სარჩელის საფუძველი ჩვენ მომავალში აღარ მოგვეცემა, რადგანაც, ჩვენ ვცდილობთ, რომ კონსტრუქციული ურთიერთობები დავამყაროთ რუსეთთან“, - განაცხადა მინისტრმა.