სახალხო დამცველის თქმით, სტრასბურგის სასამართლოს მიერ მიღებული გადაწყვეტილება არა მხოლოდ სამართლებრივი, არამედ პოლიტიკური გამარჯვებაცაა.

უჩა ნანუაშვილი მიიჩნევს, რომ ამის შემდეგ ქვეყანა შეძლებს საერთაშორისო ტრიბუნაზე დამატებითი არგუმენტაცია წარმოადგინოს იმის დამადასტურებლად, რომ რუსეთმა საქართველოს წინააღმდეგ აგრესია განახორციელა.

რაც შეეხება კომპენსაციის რაოდენობას, ომბუდსმენი ვარაუდობს, რომ საჭირო გახდება ახალი ფორმატის შექმნა, სადაც მხარეები აღნიშნულ საკითხზე შეთანხმებიან.

„ეს არის ქართველი ხალხის გამარჯვება. ჩემთვის პირადად სხვა გადაწყვეტილების გამოტანა წარმოუდგენელი იყო. ეს არის არა მხოლოდ სამართლებრივი, არამედ პოლიტიკური ხასიათის გამარჯვებაც, რადგან საუბარია სახელმწიფოთაშორის საქმეზე. რეალურად დანარჩენი უკვე პროცედურების საკითხია. 12 თვეში უნდა მოხდეს შეთანხმება კომპენსაციის რაოდენობაზე. ეს არის ჩვეულებრივი პროცედურა, რომელსაც ევროსასამართლო ხშირად იყენებს. ამ შემთხვევაში საკითხი გადაწყვეტილია, საუბარია მხოლოდ ტექნიკურ დეტალებზე. იმედი, მაქვს ყველა მსხვერპლი მიიღებს შესაბამის კომპენსაციას“, - განაცხადა ნანუაშვილმა.

სტრასბურგის სასამართლომ ცოტა ხნის წინ საქართველოს სასარგებლო გადაწყვეტილება გამოიტანა, რომლის მიხედვით რუსეთმა საქართველოს დაზარალებულ მოქალაქეებს კომპენსაცია უნდა გადაუხადოს. კომპენსაციის ოდენობა 12 თვის ვადაში მოლაპარაკებების გზით უნდა განისაზღვროს.