მანანა კობახიძე: გიგი უგულავას დაკავება იყო გადაუდებელი აუცილებლობა

პოლიტიკა - 11:32, 03 Jul, 2014

2141

საქართველოს პარლამენტის ვიცესპიკერი მანანა კობახიძე თბილისის უფლებამოსილებაშეჩერებული მერის გიგი უგულავას დაკავების შესახებ კომენტარს აკეთებს.

კობახიძის განცხადებით, როცა საქმე ბიუჯეტის თანხების მითვისება-გაფლანგვას, თანამდებობის ბოროტად გამოყენებას და ფულის გათეთრებას ეხება, პოლიტიკური სარჩული ხელოვნურად მოგონილი საფუძველია.

“ვფიქრობ, გიგი უგულავას დაკავება იყო გადაუდებელი აუცილებლობა, თუმცა, დაველოდოთ ფინანსთა სამინისტროს საგამოძიებო სამსახურის და პროკურატურის განცხადებებს. როგორც ცნობილია, იგი დაბარებული იყო დაკითხვაზე, მაგრამ მაინც აპირებდა გამგზავრებას. მიუხედავად იმისა, რომ იგი დაბრუნების პირობას დებდა, გამორიცხული არ არის, რომ არ დაბრუნებულიყო ქვეყანაში, ვინაიდან, ერთია, რას ამბობ წინასწარ და მეორე - როგორ იქცევი შემდეგ”, - განაცხადა კობახიძემ.

მისივე განცხადებით მორატორიუმი არ წარმოადგენს კანონს და თუ საჭიროა, წინასაარჩევნო პერიოდშიც საგამოძიებო მოქმედებები უნდა განხორციელდეს:

“როცა საქმე ეხება ბიუჯეტის თანხების მითვისება-გაფლანგვას, თანამდებობის ბოროტად გამოყენებას, წლების განმავლობაში გარკვეული სარგებლის მიღებას, როდესაც საუბარია მილიონობით ლარზე და მას ფულის გათეთრებას ედავებიან, პოლიტიკური სარჩული ძალიან ხელოვნურად მოგონილი საფუძველია. მერობა და ნებისმიერი თანამდებობა არ ნიშნავს იმას, რომ შენ არასოდეს მოგეთხოვება პასუხი ჩადენილი დარღვევებისთვის. ყველა ბრალს „ნაციონალური მოძრაობა“ პოლიტიკურად მოტივიებულს უწოდებს, რაც საფუძველს მოკლებულია, რადგან საუბარია რეალურ ფაქტებზე, რასაც პასუხი უნდა გასცეს უგულავამ. საბოლოო ვერდიქტს სასამართლო გამოიტანს, რომელიც დღეს არც პროკურატურის გავლენის ქვეშ იმყოფება და ასევე აბსოლუტურად დამოუკიდებელია ხელისუფლებისგან. თუმცა, სასამართლოს მიმართ ვიტყოდი, რომ მან ასევე უნდა გამოიჩინოს მიუკერძოებლობა „ნაციონალური მოძრაობისგანაც“ და არ უნდა დაუშავს, რომ დამნაშავე პირი აღმოჩნდეს გარეთ. უდანაშაულო ადამიანის მსჯავრდება დაუშვებელია, მაგრამ დამნაშავე პირის თავისუფლებაც ძალიან საფრთხის შემცველია საზოგადოებისთვის. სასამართლომ ძალიან დიდი გულისყურით უნდა განიხილოს ნებისმიერი და მათ შორის გიგი უგულავას საქმე”, - განაცხადა მანანა კობახიძემ.

თბილისის უფლებამოსილებაშეჩერებული მერი გიგი უგულავა თბილისის საერთაშორისო აეროპორტში გამთენიისას დააკავეს. უგულავა კიევში გიგა ბოკერიასთან ერთად მიემგზავრებოდა, თუმცა ფინანსთა სამინისტროს საგამოძიებო სამსახურის თანამშრომლებმა მას გამგზავრების უფლება არ მისცეს. გავრცელებული ინფორმაციის თანახმად უგულავა ამ დროისათვის ე.წ მოდულის შენობაში იმყოფება.