თბილისის უფლებამოსილებაშეჩერებული მერის გიგი უგულავას დაკავების ფაქტს საქართველოს უშიშროების საბჭოს ყოფილი მდივანი და უგულავას თანაგუნდელი გიგა ბოკერია ეხიანება.

ბოკერიას განცხადებით მაღალჩინოსნების დაკავებას საქართველოს დემოკრატია ეწირება და ამ ყოველივეს შედეგს საზოგადოება უახლოეს მომავალში იხილავს:

„აქ მოხდა კიდევ ერთი, ალბათ, ყველაზე უფრო თვალნათელი, დემონსტრაცია იმისა, თუ რა ქვეყანას აშენებენ ივანიშვილი და მისი პოლიტიკური მონები. ეს არის ქვეყანა, სადაც კანონს არავითარი მნიშვნელობა არ აქვს. სადაც ამ ოლიგარქის, ამ პოლიტიკური ავანტურისტის კაპრიზებზე არის დამოკიდებული ყველაფერი და იმის დემონსტრირებისთვის, რომ მათ შეუძლიათ პოლიტიკურ ოპონენტს აუკრძალონ გადაადგილება, რომ გაგზავნოს სიგნალი, ყველაფერი შეიძლება გაუვიდეს, პოლიტიკურ დევნას წინ ვერაფერი ვერ დაუდგება. შედეგი თვითონ ივანიშვილს დახვდება წინ, სამწუხაროდ ამ ყველაფერს ეწირება ჩვენი დემოკრატია, ჩვენ ყველანი ერთად ვნახავთ ამას“, - აცხადებს გიგა ბოკერია.

შეგახსენებთ, რომ გიგი უგულავა გამთენიისას თბილისის საერთაშორისო აეროპორტში ფინანსურმა პოლიციამ დააკავა. მას ხელბორკილები აეროპორტშივე დაადეს და ჯერჯერობით უცნობია თუ სად გადაიყვანეს. უგულავა კიევში გამგზავრებას გეგმავდა, თუმცა, სამართალდამცავებმა მას ქვეყნის დატოვების უფლება არ მისცეს.