დევნილთა და განსახლების მინისტრი დავით დარახველიძე გიგი უგულავას დაკავებას ეხმაურება.

მინისტრი ამბობს, რომ ალბათ საგამოძიებო ორგანოებს ყოფილი მერის დაკავების საფუძველი ჰქონდათ, დარახველიძე აქვე აცხადებს, რომ ნებისმიერი თანამდებობის პირი კანონის წინაშე თანასწორია.

უგულავას დაკავებით წინასაარჩევნოდ გამოცხადებული მორატორიუმი დაირღვა თუ არა, მინისტრი ამბობს, რომ მორატორიუმი საკანონმდებლო ნორმა არ არის,- "სხვა მხრივ კი უნდა დაველოდოთ საგამოძიებო ორგანოების შეფასებას".

შეგახსენებთ, რომ გვიან ღამით, გიგი უგულავა აეროპორტში, უკრაინაში გამგზავრებამდე ფინანსურმა პოლიციამ დააკავა.

შეგახსენებთ, რომ გუშინ, საქალაქო სასამართლომ "ნაციონალური მოძრაობის" საარჩევნო შტაბის ხელმძღვანელ გიგი უგულავას „სითი პარკის" საქმეზე აღკვეთის ღონისძიება არ შეუფარდა. ამ გადაწყვეტილებით მოსამართლემ პროკურატურის არცერთი შუამდგომლობა არ დააკმაყოფილა.

პროკურატურა გიგი უგულავასთვის აღკვეთის ღონისძიებად 50-ათასლარიან გირაოს, ასევე პასპორტისა და პირადობის მოწმობის ჩამორთმევას ითხოვდა.