ექსკლუზივი: ინციდენტი მოხდა გოთუას 8-ში მცხოვრებლებსა და ,,თელასის“ წარმომადგენლებს შორის

პოლიტიკა - 16:32, 02 Jul, 2014

3303

გარკვეულ ინციდენტს ჰქონდა ადგილი კომპანია ,,თელასის“ წარმომადგენლებსა და გოთუას 8-ში მცხოვრებ მოსახლეობას შორის.

როგორც ,,ნიუპოსტისთვის“ გახდა ცნობილი, კომპანია თელასი კორპუსის მოსახლეობის მიერ შეძენილი ტრანსფორმატორის ჩანაცვლებას კომპანიის კუთვნილი ტრანსპორმატორით აპირებს, რის გამოც საცხოვრებელ კორპუსს ამ წუთებში ენერგომომარაგება შეწყვეტილი აქვს. ადგილზე მობილიზებული იყო საპატრულო პოლიცია. ადგილობრივი მოსახლეობის განმარტებით, კომპანია მათი კუთვნილი ტრანსფორმატორის შედარებით სუსტი ტრანსფორმატორით ჩანაცვლებას გეგმავს, ეს კი მათ სურვილს ეწინააღმდეგება:

,,ჩვენს მიერ შეძენილი ტრანსფორმატორი არის 1000 მეგავატიანი, თელასს სურს ჩაანაცვლოს 600 მეგავატიანით, და ჩვენი ტრანსფორმატორი მიაქვთ, ჩვენ ეს არ გვსურს. მათ არავითარი საბუთი არ აქვთ და არც მოსახლეობას მიუმართავს კომპანიისათვის ტრანსფორმატორის შეცვლის თხოვნით“, - აცხადებენ ,,ნიუპოსტთან“ ადგილობრივები.

კომპანიის წარმომადგენლის განმარტებით, ტრანსფორმატორის შეცვლა საინვესტიციო პროგრამის ფარგლებში ხდება. ,,ეს არის საინვესტიციო პროგრამა, რომლითაც სარეზერვო კვება უკეთედება ამ კორპუსს, არ არის სიმართლე ის, რომ თითქოს ვგეგმავთ მათი ტრანსფორმატორის უხარისხო ანალოგით ჩანაცვლებას“, - განმარტავს თელასის წარმომადგენელი ,,ნიუპოსტთან“.

გოთუას 8 ნომერში ამ წუთებში ვითარება შედარებით განმუხტულია თუმცა მოსახლეობა კვლავ აპროტესტებს თელასის გადაწყვეტილებას.