2 ივლისს მსოფლიო სპორტული ჟურნალისტიკის დღეს აღნიშნავს

სპორტი - 11:33, 02 Jul, 2014

2407

სპორტისა და ახალგაზრდობის საქმეთა მინისტრი, ლევან ყიფიანი ჟურნალისტებს სპორტული ჟურნალისტიკის დღეს ულოცავს.
როგორც ლევან ყიფიანის მისალოც წერილშია ნათქვამი, 2 ივლისს მსოფლიო სპორტული ჟურნალისტიკის დღეს აღნიშნავს. სპორტულ ჟურნალისტთა საერთაშორისო დღეს 1920 წელს ანტვერპენის ოლიმპიური თამაშებისას ჩაეყარა საფუძველი, პარიზის მერვე ოლიმპიადაზე კი მსოფლიო სპორტისა და პრესის ასოციაცია დაფუძნდა. საქართველო ამ ასოციაციის წევრი 1992 წელიდან გახდა.
"მიუხედავად ამისა, საქართველოში სპორტულ ჟურნალისტიკას უფრო ღრმა ფესვები აქვს: პირველი ქართული სპორტული ჟურნალი "შევარდენი" 1918 წელს გამოჩნდა და მას სპორტული საზოგადოება "შევარდენი" გამოსცემდა, 1934 წელს კი გაზეთი "ფიზკულტურელი" დაარსდა, რომელსაც 1949 წლიდან სახელი შეეცვალა და დღემდე "ლელოს" სახელით ვრცელდება.
დღესდღეობით საქართველოში სპორტულ ამბებს აშუქებენ გაზეთები და ტელევიზიები, ტელეკომპანიები და სპორტული ვებ-გვერდები. ამ სფეროში მრავალი ღირსეული ჟურნალისტი მოღვაწეობს და მათთან ყოველდღიური ურთიერთობა გვაქვს, სწორედ ამიტომ, პირადად ჩემი და მთელი სპორტისა და ახალგაზრდობის საქმეთა სამინისტროს სახელით ვულოცავ მათ პროფესიულ დღესასწაულს, ბედნიერებას, ჯანმრთელობას და წარმატებას ვუსურვებ! ვიმედოვნებ, რომ ჩვენი ერთობლივი ძალისხმევით ქვეყნის სპორტულ ცხოვრებას კიდევ უფრო მრავალფეროვანს, საინტერესოსა და წარმატებულს გავხდით", - აღნიშნულია მინისტრის მისალოც განცხადებაში.