ბექაური: უგულავა მაფიოზურ კლანს ქმნიდა

პოლიტიკა - 23:01, 01 Jul, 2014

2290

ყოფილი პარლამენტარი, თბილისის უფლებამოსილებაშეჩერებული მერის გიგი უგულავას საქმის მთავარი მოწმე, კობა ბექაური „სითი პარკთან“ დაკავაშირებულ დავაზე კომენტარს აკეტებს.

ტელეკომპანია „იმედის“ გადაცემა „პოლიტიკის დროში“ ბექაურმა მისი და უგულავას ბიზნეს ურთიერთობაზე ისაუბრა და განაცხადა, რომ „სითი პარკის“ მოგება უგულავას „ჯიბის ფულად და „ნაციონალური მოძრაობისთვის“ სურდა:

„გიგი უგულავას დემაგოგია, რაც მას კამერის წინ სჩვევია, უგულავა არის ადამიანი, რომელიც ქმნიდა მაფიოზურ კლანს, მან კარგად იცის ვინც არის, 2005 წელს განვიხილავდით პარკინგის მოწესრიგების საკითხს, 2005 წელს ჩვენ გავაკეთეთ საპრეზენტაციო ნაწილი, ჩვენ ვფიქრობდით ბიზნესის განვითარებაზე, შემდეგ გაურკვეველი მიზეზების გამო დავტოვე პარლამენტი, 2007 წელს გამოცხადდა ტენდერი და ჩაიგდეს ხელში ეს პარკინგის პროგრამა იმ კომპანიას, რომელიც მე ჩამოვიყვანე. კომპანიამ, რომელმაც მოიგო, მას ხელშეკრულებით არ ჰქონდა უფლება გასულიყო, თუმცა, გაიყვანეს და ეს ყველაფერი გადააფორმეს სხვა კომპანიაზე. უთხრეს, რომ ბექაური აღარ არისო და ოთხჯერ თუ ხუთჯერ შეიცვალა ხელშეკრულება.

უგულავამ და ახვლედიანმა წინ გაიხედეს და ხელშეკრულებაში ჩადეს, რომ თუ ვინმე სითი პარკს პრობლემას შეუქმნიდა, თბილისის მერიამ სითი პარკს 60 მილიონი უნდა გადაუხადოს. ეს უგულავას თავის ჯიბის ფულად და „ნაციონალური მოძრაობის“ ფულად ჰქონდა, ამიტომ მათ ზედმეტი თვალი და ყური აღარ სჭირდებოდათ. მათ პირდაპირ დააფიქსირეს, რომ ბექაური არ უნდა ყოფილიყო სითი პარკის თემაში“, - აცხადებს ბექაური.