„ნაციონალური მოძრაობის“ წევრი ირმა ნადირაშვილი გიგი უგულავასთვის ახალი ბრალდების წარდგენას პოლიტიკურ დევნად აფასებს. ამის შესახებ ნადირაშვილმა გადაცემა „არჩევანში“ სტუმრობისას განაცხადა.

დეპუტატი ინტერესდება თუ არსებობს ვერსია, რომ უგულავა შეკრული იყო „სითი პარკთან, რატომ არ არიან დაკითხული აღნიშნული კომპანიის თანამშრომლები.

„ვფიქრობ, უგულავასთვის ვის შეხვედროდა და ვის არა, სასამართლოს არ აუკრძალავს. არ მოერიდა ქვეყნის ხელისუფლება, რომ არჩევნები არ არის დასრულებული. გიგი უგულავა არის საარჩევნო შტაბის ხელმძღვანელი და მას შეუქმნეს პრობლემები, რომ არ გასულიყო ქვეყნიდან. რა თქმა უნდა, ამას ვაფასებ, როგორც პოლიტიკურ დევნად. ამ ეჭვს კიდევ უფრო მიმყარებს ის ფაქტი, რომ მთავარი მოწმე არის კობა ბექაური. სულ ორი თაღლითი იყო ქვეყანაში - ჟოზეფ ქეი და კობა ბექაური და ორივე გიგი უგულავას წინააღმდეგ იყო გამოყენებული. თვითონ „სითი პარკის“ თანამშრომლები კი დაკითხულები არ არიან. არანაირი ბრალი მათ წინააღმდეგ წარდგენილი არ არის. არის საუბარი, რომ გიგი უგულავა შეკრული იყო „სითი პარკთან“, რაღაც კოდები შექმნა და ასე შემდეგ. თუკი ერთი მხარე დაიკითხა, მეორე მხარეც ხომ უნდა იყოს დაკითხული?! ქალბატონი ხათუნა და ქალბატონი თამარი რომ ხარაგაულში დააჯარიმონ, ჭიკაიძე უნდა დავიჭიროთ, რომ იმ რაიონში შევიდა ბიუჯეტში ფული?!“, - განაცხადა ნადირაშვილმა.