საქართველოს ენერგეტიკის მინისტრი კახა კალაძე „ნაციონალური მოძრაობის“ წევრებთან დაკავშირებით აზერბაიჯანის აეროპორტში მომხდარ ინციდენტს იხსენებს. კალაძის განცხადებით ირმა ნადირაშვილსა და ზურაბ ჯაფარიძეს აზერბაიჯანიდან ნამდვილად გადმოჰქონდათ შავი ფული, თუმცა, გარკვეული მნიშვნელოვანი მიზეზების გამო ეს თემა აღარ იქნა გამოძიებული. მინისტრმა ამის შესახებ ტელეკომპანია „იმედის“ გადაცემა „პოლიტიკის დროში“ ისაუბრა

„ჩვენ რეალობაზე დაყრდნობილი ინფორმაცია მივაწოდეთ საზოგადოებას, ნადირაშვილი 4 საათის განმავლობაში მართლაც იყო დაკავებული, მას და ბატონ ჯაფარიძეს მოჰქონდათ შავი ფული, ნადირაშვილს 350 ათასი ედო ჩანთაში. ეს ყველაფერი მიჩუმათდა, რადგან აქ იყო სახელმწიფოებს შორის ურთიერთობების თემა, ჩვენც არ მივყევით ბოლომდე, გარკვეული მნიშვნელოვანი თემების გამო.

ბატონმა ჯაფარიძემ განაცხადა, რომ იმყოფებოდნენ აზერბაიჯანში და განიხილავდნენ გარდაბანში და მარნეულში მიმდინარე მოვლენებს. ჩვენ ჩვენი კანდიდატი მარნეულში იმიტომ მოვხსენით, რომ გვქონდა ინფორმაცია „ნაციონალური მოძრაობა“ ეთნიკური ნიადაგის საფუძველზე არეულობის მოწყობას გეგმავდა“, - განაცხადა კახა კალაძემ.