საქართველოს ენერგეტიკის მინისტრი კახი კალაძე „ერთიანი ნაციონალური მოძრაობის“ მოთხოვნას მისი დაკითხვის შესახებ გადაცემა „პოლიტიკის დროში“ გამოეხმაურა. კალაძე „ნაციონალურ მოძრაობას“ სიცრუეში ადანაშაულებს და აცხადებს, რომ მათი მხრიდან მსგავსი ქმედება არ უკვირს. კალაძის განცხადებით, მას არანაირი კავშირი არ ჰქონია „რემენასთან“ და ფიქრობს, რომ ეს ყველაფერი მის წინააღმდეგ აგორებული შავი პიარის გაგრძელებაა.

„ეს არის აბსურდი, „ნაციონალური მოძრაობა“ აგრძელებს თავის სტილს. მათი პოლიტიკა დაფუძვნებულია სიცრუზე და დემაგოგიაზე. ეს სიახლე არ არის საზოგადოებასთვის. წლებია ვუყურებთ მათ მიერ დადგმულ შოუებს. გავიხსენოთ 2012 წელი, როდესაც შემოვედი პოლიტიკაში თუ რა ხდებოდა კონკრეტულად ჩემთან მიმართებაში. ჩემი მისამართით მიმდინარეობდა შავი პიარი და ეს ეხლაც გრძელდება „ნაციონალური მოძრაობის“ წარმომადგენლების მხრიდან. მაშინ ჯერ კიდევ საკუთარი ტელევიზიების საშუალებით ახორციელებდნენ ამას. ამას ახორციელებდნენ „რუსთავი 2“-ის და „იმედი“-ის მეშვეობით, რომელიც პატარკაციშვილების ოჯახს უგულავას მეთაურობით ჩამოართვეს და მიხეილ სააკაშილის საკუთრებაში იყო. დღეს „რუსთავი 2“ დარჩა მიხეილ სააკაშვილის საკუთრებაში მთელი პასუხისმგებლობით ვამბობ, რომ არ ვიცნობ „რემენას“ და მასთან არანაირი კავშირი არასდროს არ მქონია“, - განაცხადა კალაძემ.