"ნაციონალური მოძრაობის" ერთ-ერთმა ლიდერმა ზურაბ ჭაბერაშვილმა უწყებათაშორისი კომისიის სხდომა პროტესტის ნიშნად დატოვა. მისი განმარტებით, სხდომაზე პროკურატურის მხრიდან „ცინიზმით სავსე და უსუსური“ განმარტებები მიიღო.

ჭიაბერაშვილის განცხადებით, კომისიის ხელმძღვანელი თეა წულუკიანი ცდილობს საქმე ისე წარმოაჩინოს, თითქოს პროკურატურა კანონის მიხედვით მოქმედებს.

"უწყებათაშორისი კომისიის სხდომა პროტესტის ნიშნად დავტოვე. მთელი ამ ხნის განმავლობაში ყველა სხდომაზე ვცდილობდით მოგვესმინა ადეკვატური განმარტება როგორც კომისიისგან, ისე იუსტიციის მინისტრისგან. სამწუხაროდ, ხდება ერთი და იგივე რამ – პროკურატურის უკანონო ქმედებების გამართლება აბსოლუტურად ცინიკური მეთოდით. დღესაც იგივე მოხდა, როდესაც ჩვენ ვსაუბრობდით გიგი უგულავას ფინანსურ პოლიციაში დაბარებასა და მისთვის ბრალის წარდგენაზე, რაზეც კომისიაში აღიარეს, რომ ეს მორატორიუმის პირობების დარღვევა იყო. განსაკუთრებით მძიმე იყო იმის მოსმენა, თუ როგორი განმარტება გააკეთა პროკურატურამ დედოფლისწყაროში მომხდარ ფაქტთან დაკავშირებით, როცა 71 წლის დიმიტრი ყოჩიაშვილს ფიზიკური შეურაცხყოფა მიაყენეს. პროკურატურა დეტალურად განმარტავდა, იყო თუ არა ეს ცემის ფაქტი. ასეთი ცინიზმით სამწუხაროდ შორს ვერ წავალთ. დღევანდელი სხდომა იყო იმის კიდევ ერთი დადასტურება, რომ უწყებათაშორისი კომისია არის უუნარო", - განაცხადა ზურაბ ჭიაბერაშვილმა.