ჩემს საქმეში ბრალდების მთავარი მოწმე კობა ბექაურია

ჩემს საქმეში ბრალდების მთავარი მოწმე კობა ბექაურია - გიგი უგულავა

პოლიტიკა - 15:40, 30 Jun, 2014

1814

ფინანსთა სამინისტროს საგამოძიებო სამსახურიდან გამოსული გიგი უგულავა გამოძიების ბრალდებებს აბსურდულს უწოდებს და ბრალდების მთავარ მოწმედ კობა ბექაურს ასახელებს.

"ბრალდება არის აბსურდული და მთავარი მოწმე ამ ბრალდებაში არის კობა ბექაური. როცა ეს გავიგე, ხუთი წუთი ვფიქრობდი, თუ საერთოდ რა კავშირშია ის ამ საქმესთან. აქედან გამომდინარე, საქართველოში სელექციური მართლმსაჯულება კი არ არის, საქართველში ცინიკური მართლმსაჯულებაა და ეს მოდის ერთადერთი ადამიანისგან, მისი სახელია ბიძინა ივანიშვილი", - განაცხადა გიგი უგულავამ და აღნიშნა, რომ მის ადვოკატებს არ მისცეს ბექაურის ჩვენება.

"როგორც წესი, ტომებს გადმოგვცემენ ხოლმე, მაგრამ გვითხრეს, რომ საქმის მასალები ჯეროვნად არ არის. ადვოკატის მოთხოვნაზე, რომ ბექაურის ნაწილი მოეცათ, უპასუხეს, რომ ის საქმეში იქნება, ხუთი წუთი სჭირდებოდა ბექაურის ჩვენება რომ მოეცათ, თუმცა არ მოუციათ. როგორც ჩანს, ეს არის შაბლონური ჩვენება. თუმცა, მეც დიდი სიამტკბილობით წავიკითხავდი მის ჩვენებას", - განაცხადა გიგი უგულავამ.

თბილსის ყოფილი მერი გიგი უგულავა სამხურეობრივი მდგომარეობის გამოყენებით, სახელმწიფო ბიუჯეტის კუთვნილი დიდი ოდენობის თანხების გაფლანგვის ბრალდებით სისხლის სამართლის პასუხისგებაში მიეცა.

საქმე ეხება სიტი პარკსა და თბილისის მერიას შორის 2007 წელს გაფორმებულ ხელშეკრულებას.

"თბილისის მერმა გიგი უგულავამ ცენტრალური ბიუჯეტის განზრახ იგნორირებით კანონთან შეუსაბამო ბრძანების საფუძველზე სიტი პარკისთვის დამატებითი შეღავათების დაწესებით კომპანიის სასარგებლოდ მთლიანობაში გაფლანგა სახელმწიფოს კუთვნილი დიდი ოდენობით თანხა: 1 086 718 ლარი. საქმეზე გამოძიება გრძელდება სისხლის სამართლის კოდექსის 182-ე მუხლის მეორე და მესამე ნაწილებით, რაც სასჯელის სახედ და ზომად თავისუფლების აღკვეთას 7-დან 11 წლამდე ვადით ითვალისწინებს", - განაცხადეს ფინანსთა სამინისტროს საგამოძიებო სამსახურში.