საპარლამენტო უმცირესობის წევრმა ზურაბ ჯაფარიძემ თბილისის ყოფილი მერის გიგი უგულავას სისხლის სამართლის პასუხისგებაში მიცემასთან დაკავშირებით კომენტარი გააკეთა. ჯაფარიძე მიიჩნევს, რომ მთავრობამ თავისივე დადგენილი მორატორიუმი დაარღვია, რომელიც არჩევნების დამთავრებამდე დაკითხვეაზე დაბარებების შეწყვეტას ითვალისწინებდა.

“გიგი უგულავა მიემგზავრებოდა, მას ჰქონდა საქმიანი ვიზიტი, ევროსაბჭოს ეგიდით იმართება სპეციალური სხდომა, რომელიც ეძღვნება ადგილობრივი თვითმმართველობის საკითხებს. გიგი უგულავა უნდა ყოფილიყო დელეგაციის ხელმძღვანელი, ამიტომ ჩვენ განვიხილავთ ამ დაბარებას, როგორც ხელის შეშლის მცდელობას, რომ ეს ვიზიტი არ შედგეს ერთის მხრივ, ხოლო მეორეს მხრივ ცხადია ეს არის ზეწოლის გაგრძელება, მოგეხსენებათ გიგი უგულავა არის საარჩევნო კამპანიის ხელმძღვანელი და ჩვენ ვართ ინტენსიურ მზადებაში მეორე ტურისთვის.

ძალიან ცალსახაა, რომ დაირღვა ეს მორატორიუმი, რომელიც თვითონ გამოცხადა მთავრობამ, რომელიც გულისხმობდა იმას, რომ დაკითხვებზე დაბარებები შეწყვეტილიყო არჩევნების დამთავრებამდე, არჩევნები ჯერ არ არის დამთავრებულია, ამიტომ ჩვენ ვითხოვთ, რომ გაიმართოს უწყებათშორისი კომისიის სხდომა, სადაც მოხდება ამ საკითხის განხილვა“,- განაცხადა ზურაბ ჯაფარიძემ.

გიგი უგულავა სამხურეობრივი მდგომარეობის გამოყენებით, სახელმწიფო ბიუჯეტის კუთვნილი დიდი ოდენობის თანხების გაფლანგვის ბრალდებით სისხლის სამართლის პასუხისგებაში მიეცა. საქმე ეხება სიტი პარკსა და თბილისის მერიას შორის 2007 წელს გაფორმებულ ხელშეკრულებას.