„ნელ-ნელა ვემშვიდობებით იმ ნოტარიუსებს, რომლებიც წინა ხელისუფლების პირობებში პროკურორებთან ერთად ადამიანების უბედურებაში მონაწილეობდნენ , - ამის შესახებ იუსტიციის მინისტრმა თეა წულუკიანმა სასტუმრო "რედისონში" განაცხადა.

"ჩვენ ვაგრძელებთ ნოტარიუსთა პალატის გარდაქმნას. თქვენ იცით, რომ ჩემი მიზანი იყო, ნოტარიუსის პროფესიის რეპუტაციის ამაღლება საზოგადოების თვალში, რადგან უნდა ვაღიაროთ, რომ წინა ხელისუფლების პირობებში, ნოტარიუსი იყო მონაწილე ძალიან ბევრი ჩვენი საზოგადოების წევრის უბედურებისა, ჩვენ ვასრულებთ იმ კულტურას, რომ ნოტარიუსთან შეიძლება ვინმემ ვინმეს ძალადობრივად რაიმე ქონება გადაუფორმოს. ამისთვის არის მთელი სიმკაცრით ამუშავებული დისციპლინური ფორმები. ჩვენ ნელ-ნელა ვემშვიდობებით იმ ნოტარიუსებს, რომლებიც წინა ხელისუფლების პირობებში მონაწილეობდნენ ადამიანების უბედურებაში, პროკურორებთან ერთად", - განაცხადა თეა წულუკიანმა.

მისი თქმით, დღევანდელ ღონისძიებაზე საზოგადოებას ნოტარიუსთა პალატის განახლებულ სახეს, ახალ ლოგოს, ახალ ბრენდს წარუდგენენ.

"მოვედი, რომ მადლობა გადავუხადო ყველა იმ ნოტარიუსს, რომელმაც გაიგონა იუსტიციის მინისტრის სიტყვა, რომელიც ეხება მოქალაქეების ინტერესის წინ დაყენებას, ვიდრე გარიგებებიდან ფულის მიღების ინტერესისა, როგორც ეს ზოგიერთ ნოტარიუსს სჩვეოდა და წავიდა იმ რაიონებში, იქ დასახლდა და ემსახურება ჩვენი საზოგადოების ინტერესებს. მე მოვედი, რომ მადლობა გადავუხადო იმ ნოტარიუსებს, ვინც გაიგონა იუსტიციის მინისტრის სიტყვა", - განაცხადა თეა წულუკიანმა.