“ქართული ოცნება” განმეორებითი კენჭისყრის შედეგებს ეხმაურება

პოლიტიკა - 12:21, 30 Jun, 2014

1552

კოალიცია “ქართული ოცნება” ადგილობრივი თვითმმართველობისარჩევნებზე განმეორებითი კენჭისყრის შედეგებს ეხმაურება.

კოალიციის საარჩევნო შტაბის პრესსპიკერი გიორგი გეგეჭკორი აცხადებს, რომ როგორც მოსალოდნელი იყო, კოალიციის მაჟორიტარობის კანდიდატები, მთელი ქვეყნის მასშტაბით, ერთი ოლქის გარდა, ამჯერადაც დამაჯერებელად ლიდერობენ.

“29 ივნისს, საქართველოს სხვადასხვა რეგიონის მაჟორიტარულ საარჩევნო ოლქებში გაიმართა განმეორებითი კენჭისყრა. ეს ის ოლქებია, რომლებშიც ცენტრალური საარჩევნო კომისიის გადაწყვეტილებით, 15 ივნისს ჩატარებული თვითმმართველობის არჩევნების შედეგები ბათილად იქნა ცნობილი.

გვინდა საქართველოს მოსახლეობას მივულოცოთ არჩევნების მშვიდ და დემოკრატიულ გარემოში ჩატარება. სერიოზული ხარვეზები, რომლებიც გავლენას მოახდენდა არჩევნების შედეგებზე, კენჭისყრის მიმდინარეობისას არ დაფიქსირებულა.

წინასწარი მონაცემებით, როგორც მოსალოდნელი იყო, კოალიცია „ქართული ოცნების“ მაჟორიტარობის კანდიდატები, მთელი ქვეყნის მასშტაბით, ამჯერადაც დამაჯერებელად ლიდერობენ უკლებლივ ყველა ოლქში, გარდა ერთისა", - განაცხადა გიორგი გეგეჭკორმა და განმეორებით კენჭისყრაში მონაწილე ყველა პირს მადლობა გადაუხადა.

გეგეჭკორი დარწმუნებულია, რომ არჩევნების მეორე ტურში მათი მხარდამჭერები კიდევ უფრო გააქტიურდებიან და "ქართული ოცნება" დამაჯერებელ გამარჯვებას მოიპოვებს.