აშშ მხარს დაუჭერს რუსეთის მიერ აღებული ვალდებულებების დარღვევებზე ეუთოს რეზოლუციას

პოლიტიკა - 21:18, 29 Jun, 2014

1568

ამერიკელმა სენატორმა ბენ კადინიმ საქართველოში ერთდღიანი ვიზიტის შეფასებისას ხაზი გაუსვა საქართველოში ჩამოსვლის მნიშვნელობას. მისი თქმით, სტუმრობის მიზანი არის ის, რომ ისინი ხვალ მიემგზავრებიან აზერბაიჯანში, სადაც ეუთოს საპარლამენტო ასამბლეაზე ამერიკის შეერთებულ შტატებს წარმოადგენენ.

"ჩვენ ჩავთვალეთ, რომ მნიშვნელოვანი იყო საქართველოში ჩამოსვლა იმ მნიშვნელობისთვის, რომელსაც ჩვენ ვანიჭებთ საქართველოს ამ რეგიონში. ბაქოში ჩვენ მხარს დავუჭერთ რეზოლუციას ეუთოს საპარლამენტო ასამბლეაზე, რომელზეც იქნება განხილული რუსეთის მიერ აღებული ვალდებულებები დარღვევებზე. ჩვენ ყოველთვის ვსაუბრობთ რუსეთის აგრესიის მიუღებლობაზე. უკანასკნელ პერიოდში ჩვენ ასევე ხმამაღლა ვსაუბრობთ უკრაინის ტერიტორიული მთლიანობის მნიშვნელობასა და მის მხარდაჭერაზე და რუსეთის როლზე ამ საკითხში“, - აღნიშნა სენატორმა.

სენატორმა საქართველოში ჩატარებული ადგილობრივი თვითმმართველობის არჩევნებთან დაკავშირებითაც ისაუბრა და ქვეყანას ამ არჩევნების ჩატარება მიულოცა. "ჩვენ ვხედავთ ერთგულებას, რომელსაც საქართველო ავლენს როგორც დემოკრატიისადმი, ასევე ძირითადი ადამიანის უფლებებისადმი", - დასძინა მან.

ამერიკის შეერთებული შტატების კონგრესის დელეგაცია საქართველოს დღეს ეწვია. დელეგაციას ხელმძღვანელობს სენატორი ბენ კარდინი, რომელიც ევროპის უშიშროებისა და თანამშრომლობის კომიტეტის თავმჯდომარე და სენატის საგარეო ურთიერთობათა კომიტეტის უფროსი წევრია. დელეგაციის შემადგენლობაში არიან სენატორი ტომ ჰარკინი, კონგრესმენი რობერტ ადერჰოლტი, კონგრესმენი ადამ შიფი, ასევე კონგრესმენი ფილ გინგრი და კონგრესმენი დევიდ შვაიკერტი.