ბენ კარდინი: დიდი შთაბჭდილება მოახდინა გარდამავალმა პერიოდმა, რომელიც ქვეყანამ გაიარა

პოლიტიკა - 21:08, 29 Jun, 2014

1157

სენატორი დადებითად აფასებს საქართველოში გარდამავალ პროცესს, რაც ერთი მთავრობიდან მეორე მთავრობაზე გადასვლას გულისხმობს.

სენატრომა, ვიზიტის ფარგლებში საქართველოს პრეზიდენტთან, პრემიერ-მინისტრთან, მინისტრთა კაბინეტის წევრებსა და წამყვანი ოპოზიციური პარტიების წარმომადგენლებთან შეხვედრაზე ისაუბრა.

"თითოეულ ამ შეხვედრაზე ჩვენ ხაზს ვუსვამდით მეგობრობას, რომელიც არსებობს ამერიკის შეერთებულ შტატებსა და საქართველოს შორის. ასევე ორმხრივი ურთიერთობების მნიშვნელობას და იმ მნიშვნელობას, რომელსაც ჩვენ ვანიჭებთ ამ ორმხრივი ურთიერთობების და კავშირების გაღრმავებასა და განმტკიცებას", - აღნიშნა სენატორმა.

ბენ კარდინის განცხადებით, საქართველოს მიერ ევროკავშირთან ასოცირების ხელშეკრულების ხელმოწერა, რომელიც სულ ახლახან შედგა, არის დამოუკიდებელი საქართველოს თავისუფალი ნების გამოხატულება.

"ჩვენ საქართველოში ვიმყოფებით როგორც მეგობრები და ძალზე დიდი შთაბეჭდილება მოახდინა ჩვენზე საქართველოს ხელმძღვანელობის მაღალმა ხარისხმა. განსაკუთრებით კი გარდამავალმა პერიოდმა, რომელიც ქვეყანამ გაიარა, ერთი მთავრობიდან მეორე მთავრობაზე გადასვლას ვგულისხმობ, რაც ნორმალურია და დამახასიათებელია ნებისმიერი დემოკრატიული ქვეყნისა და საზოგადოებისთვის", - აღნიშნა სენატორმა.

ამერიკის შეერთებული შტატების კონგრესის დელეგაცია საქართველოს დღეს ეწვია. დელეგაციას ხელმძღვანელობს სწორედ სენატორი ბენ კარდინი, რომელიც ევროპის უშიშროებისა და თანამშრომლობის კომიტეტის თავმჯდომარე და სენატის საგარეო ურთიერთობათა კომიტეტის უფროსი წევრია. დელეგაციის შემადგენლობაში არიან სენატორი ტომ ჰარკინი, კონგრესმენი რობერტ ადერჰოლტი, კონგრესმენი ადამ შიფი, ასევე კონგრესმენი ფილ გინგრი და კონგრესმენი დევიდ შვაიკერტი.