მნიშვნელოვანია, აშშ-ს ინტერესთა ფოკუსი იყოს ისეთივე მაღალი, როგორც ეს იყო წლების განმავლობაში

მნიშვნელოვანია, აშშ-ს ინტერესთა ფოკუსი იყოს ისეთივე მაღალი, როგორც ეს იყო წლების განმავლობაში - გიგა ბოკერია

პოლიტიკა - 19:19, 29 Jun, 2014

1585

აშშ-ს კონგრესის დელეგაცია დღეს ,,ნაციონალური მოძრაობის“ ლიდერებს პარტიის ოფისში შეხვდა. პარტიის ერთ-ერთი ლიდერის გიგა ბოკერიას განცხადებით, საუბარი ეხებოდა ყველა იმ ამოცანას, რომელიც დგას საქართველოს წინაშე , მათ შორის ინტეგრაცია ნატოში და უსაფრთხოების გამოწვევები.

,,ძალიან მნიშვნელოვანი დელეგაცია იმყოფება საქართველოში, განსაკუთრებით სენატორი კარდინი, რომელიც არის საქართველოს დიდი ხნის მეგობარი და ერთ-ერთი მთავარი შემქმნელი მაგნიტცკის აქტის. მოგეხსენებათ ეს არის აქტი, რომელიც რუსეთის ფედერაციის თანამდებობის პირების წინააღმდეგ არის მიმართული, ვინც ადამიანის უფლებებს არღვევდა და არღვევს. ჩვენთვის მნიშვნელოვანია, რომ ამ ტიპის ფიგურებმა და კონგრესის წარმომადგენლებმა ადგილზე ნახონ აქ ვითარება, ინტერესთა ფოკუსი საქართველოზე იყოს ისეთივე მაღალი, როგორც ეს იყო წლების განმავლობაში და ასეთად შენარჩუნდეს. ჩვენ გავცვალეთ აზრები უსაფრთხოების საკითხებზე, რეგიონულ გამოწვევებზე, ქვეყნის შიგნით არსებულ ვითარებაზე და დემოკრატიის პრობლემებზე. ჩვენი შეხვედრის მთავარი თემა იყო ყველა ის ამოცანა, რომელიც დგას საქართველოს წინაშე - დაახლოება შეერთებულ შტატებთან ყველა საკითხში, ინტეგრაცია ნატოში და ჩვენი უსაფრთხოების გამოწვევები“, - განაცხადა გიგა ბოკერიამ.