სასამართლო ნარკოტიკებთან და ხულიგნობასთან დაკავშირებულ საქმეებს დაუყოვნებლივ განიხილავს

პოლიტიკა - 12:28, 29 Jun, 2014

808

რამოდენიმე ადმინისტრაციულ სამართალდარღვევებთან დაკავშირებით სასამართლო ვალდებული იქნება საქმის განხილვა დაუყოვნებლივ – სამართალდარღვევის ოქმისა და საქმის მასალების მიღებითანავე დაიწყოს.
საქმე ეხება "ადმინისტრაციული სამართალდარვევათა კოდექსის" 45-ე, 166-ე და 173-ე მუხლებით გათვალისწინებულ ქმედებებზე, რომელიც თავის მხრივ ეხება ექიმის დანიშნულების გარეშე ნარკოტიკული საშუალების მოხმარებას, გასაღების მიზნის გარეშე მცირე ოდენობის ნარკოტიკული საშუალების უკანონო შეძენა-შენახვას, წვრილმან ხულიგნობას და სამართალდამცავის კანონიერი მოთხოვნისადმი დაუმორჩილებლობას ან მის მიმართ სხვა კანონსაწინააღმდეგო ქმედების განხორციელებას.
აღნიშნულ სამართალდარღვევებთან დაკავშირებით რეაგირებაზე შინაგან საქმეთა სამინისტროა უფლებამოსილი. შსს-ს წარმომადგენელი დარღვევის აღმოჩენის შემთხვევაში, ვალდებულია სამართალდარღვევის ჩადენის ფაქტი აღმოფხვრას, დააკავოს მოქალაქე და ადმინისტრაციული სახდელის შესაფარდებლად სასამართლოს წარუდგინოს.

ამ მიმართულებით კი, "ადმინისტრაციულ სამართალდარვევათა კოდექსში" ცვლილებები შედის, რომელიც დეპუტატებმა ვახტანგ ხმალაძემ და შალვა შავგულიძემ მოამზადეს და განსახილევლად პარლამენტს უკვე წარუდგინეს.

ვახტანგ ხმალაძისა და შალვა შავგულიძის მიერ მომზადებული საკანონმდებლო ინიციატივის მიხედვით, "ადმინისტრაციულ სამართალდარღვევათა კოდექსის" 45-ე, 166-ე და 173-ე მუხლებით გათვალისწინებული ადმინისტრაციული სამართალდარღვევათა საქმეები ერთი დღე-ღამის განმავლობაში განიხილება. საქმის განმხილველი სასამართლო ზეპირ განხილვას იწყებს დაუყოვნებლივ - ადმინისტრაციული სამართალდარღვევის ოქმისა და ადმინისტრაციული წარმოების სხვა მასალების მიღებისთანავე.