ცესკოში პირველი საინფორმაციო ბრიფინგი გაიმართა

პოლიტიკა - 10:54, 29 Jun, 2014

675

29 ივნისის განმეორებითი კენჭისყრის პროცესის შესახებ ცესკოში პირველი საინფორმაციო ბრიფინგი გაიმართა. როგორც ცესკოს სპიკერმა ეკა აზარაშვილმა ჟურნალისტებს განუცხადა, 2014 წლის თვითმმართველობის არჩევნების განმეორებითი კენჭისყრა 9 ოლქის 14 უბანზე იმართება. ყველა უბანი დროულად - 08:00 სთ-ზე გაიხსნა და პირველმა ამომრჩევლებმა უკვე გააკეთეს არჩევანი. კენჭისყრა მშვიდ გარემოში მიმდინარეობს.

ეკა აზარაშვილმა მედიას ასევე გააცნო №81 ქობულეთის ოლქის №34 უბანზე ინციდენტის შესახებ, სადაც იმყოფება არაუფლებამოსილი პირი ”ერთიანი ნაციონალური მოძრაობიდან”; ”საუბნო საარჩევნო კომისიის წარმომადგენლებმა მას რამდენჯერმე მიმართეს დაეტოვებინა უბანი, რაზეც აღნიშნული პირი უარს აცხადებს. ცესკო მოუწოდებს არჩევნებში ჩართულ მხარეებს კანონმდებლობით განსაზღვრული წესები დაიცვან და ხელი შეუწყონ კენჭისყრის პროცესის მშვიდ გარემოში წარმართვას” - განუცხადა ცესკოს სპიკერმა ჟურნალისტებს.

დღეს, დღის განმავლობაში კენჭისყრის მიმდინარეობის და ამომრჩეველთა აქტივობის შესახებ ცესკო რამდენიმე საინფორმაციო ბრიფინგს გამართავს. ამომრჩეველთა აქტივობის შესახებ კომისია პირველ მონაცემებს 12:30 სთ-ზე გამოაცხადებს.

შეგახსენებთ, რომ ცესკოს ცხელი ხაზი 2 51 00 51, ასევე ონლაინ ჩატი და ონლაინ ოპერატორი ჩვეული დატვირთვით მუშაობს. შესაბამისად, ყველას შეეძლება პასუხის მიღება არჩევნებთან დაკავშირებული ნებისმიერი საკითხის შესახებ.