სტრასბურგის სასამართლოს გადაწყვეტილებით საქართველო დარჩება გამარჯვებული

სტრასბურგის სასამართლოს გადაწყვეტილებით საქართველო დარჩება გამარჯვებული - წულუკიანი

პოლიტიკა - 23:10, 28 Jun, 2014

2237

3 ივლისს სტრაბურგის სასამართლო 2006 წელს საქართველოს მიერ რუსეთის წინაარმდეგ შეტანილ სარჩელზე გადაწყვეტილებას გამოიტანს, - ამის შესახებ იუსტიციის მინისტრმა თეა წულუკიანმა ,,რუსთავი 2“-ის ეთერში ისაუბრა.

მინისტრმა იმედი გამოთქვა, რომ სასამართლო მიიღებს ისეთ გადაწყვეტილებას, რომელიც იქნება ქართველი ხალხის და იმ ადამიანების გამარჯვება, რომლებიც რუსეთის მსხვერპლნი გახდნენ.

მისი თქმით, ეს არის პირველი სახელმწიფოთაშორისო საქმე, რომელიც საქართველომ შეიტანა რუსეთის წინააღმდეგ.

"ჩვენ, 3 ივლისს, მხარეები, საქართველო და რუსეთი, ვართ მიწვეული სტრასბურგის სასამართლოს დიდი პალატის წინაშე, რათა სტრასბურგის სასამართლოს დიდმა პალატამ გამოგვიცხადოს გადაწყვეტილება, რომელიც მან მიიღო 2006 წელს საქართველოს მიერ შეტანილ საჩივარზე. ეს არის პირველი სახელმწიფოთაშორისო საქმე, რომელიც საქართველომ შეიტანა რუსეთის წინააღმდეგ, როდესაც ჩვენი თანამოქალაქეები, ადამიანის უფლებების დარღვევით გამოაძევეს რუსეთიდან. როდესაც მე სტრასბურგის სასამართლოში ვმუშაობდი, ეს საჩივარი შემოიტანა კონსტანტინე კორკელიამ, რომელიც გახლდათ იუსტიციის მინისტრის მოადგილე და ძალიან ბევრი იდეაფიქსის მიუხედავად, მინდა ცალსახად ვთქვა, რომ ჩემი წინამორბედი არ არის ამ საჩივრის ავტორი. ის ცრუ ქებათა ქება საკუთარი თავის, რომელიც ჩვენი წინამორბედი ხელისუფლების წევრებისგან ისმის, მეჩვენება, რომ ბავშვობანაა", - აღნიშნა თეა წულუკიანმა.

მინისტრი იმედოვნებს, რომ სტრასბურგის გადაწყვეტილება იქნება სამართლიანი.

"მე მჯერა, რომ სტრასბურგის სასამართლო იქნება პირუთვნელი, დამოუკიდებელი და იქნება სამართლიანი. ამ გადაწყვეტილების სამართლიანობა ნიშნავს იმას, რომ საქართველო უნდა დარჩეს გამარჯვებული. ჩვენ ყველას გვახსოვს, როგორ დამამცირებელ პირბებში გამოაძევეს ჩვენი მოქალაქეები. ეს იქნება იმ ქვეყნის და იმ ადამიანების გამარჯვება, რომელებიც რუსეთის მსხვერპლნი გახდნენ. ეს არ იქნება რომელიმე მთავრობის გამარჯვება. მას შემდეგ რაც მე იუსტიციის მინისტრი ვარ, არაერთი ქმედება იქნა განხორციელებული იმისთვის, რომ ეს საჩივარი გამეტანა. მაგრამ, 3 ივლისს, მე ამ გადაწყვეტილებას მოვისმენ და მთელ საქართველოს გავაცნობ რა გადაწყვეტილებას მიიღებს სტრასბურგის სასამართლო", - განაცხადა იუსტიციის მინისტრმა.