ბათუმში მიმდინარე თავდაცვის და უსაფრთხოების კონფერენციაზე სიტყვით გამოსვლისას, საქართველოს პრემიერმინისტრმა ირაკლი ღარიბაშვილმა განაცხადა, რომ საქართველოს შეიარაღებული ძალები, ამჟამად, ნატო-სთან თავსებადობის უმაღლეს საფეხურზე იმყოფება და ეს საამაყოა:

"როგორც ასპირანტი და სანდო პარტნიორი, ISAF-ის ოპერაციის დასრულებამდე ავღანეთში ჩვენ შევინარჩუნებთ იქ ამ ეტაპზე არსებულ კონტინგენტს - 1600 სამხედრო მოსამსახურეს.

სულ ახლახანს, ევროკავშირის მისიის მხარდასაჭერად 160 ქართველი მოსამსახურე გაემგზავრა ცენტრალური აფრიკის რესპუბლიკაში. ეს ჩვენთვის პირველი მისიაა ევროკავშირის ეგიდით, რომელიც, დარწმუნებული ვარ, წარმატებული იქნება.

მოგეხსენებათ, რომ ჩვენი სტრატეგიული მდებარეობა საშუალებას გვაძლევს ხელი შევუწყოთ აღმოსავლეთსა და დასავლეთს შორის ტრანსპორტირებისა და კომუნიკაციის განვითარებას. აქედან გამომდინარე, ჩვენ გვაქვს საშუალება ალიანსის წევრ ქვეყნებს დავეხმაროთ ISAF-ში მონაწილე ძალების უზრუნველყოფაში და ამ მისიის დასრულებისას ავღანეთიდან ტვირთისა და პირადი შემადგენლობის გამოყვანაში.

საქართველო განსხვავდება იმისგან, რაც 2008 წელს იყო. საყოველთაოდ არის აღიარებული, რომ ქმედითუნარიანობის თვალსაზრისით საქართველო მზადაა შემდეგი ნაბიჯისთვის. ამავე დროს, ჩვენ თანამიმდევრული და პასუხისმგებლობიანი დამოკიდებულება გვაქვს ჩვენი ჩრდილოელი მეზობლის მიმართ. საქართველო განაგრძობს რუსეთთან კონსტრუქციულ დიალოგს და თავს არიდებს ყოველგვარ შესაძლო პროვოკაციას.

საქართველომ დაამტკიცა, რომ ის ერთგულად ემსახურება საერთაშორისო სტაბილურობისა და უსაფრთხოების განმტკიცების საქმეს და ნამდვილად შესწევს უნარი საკუთარი წვლილი შეიტანოს საერთო ევროატლანტიკური უსაფრთხოების განმტკიცების საქმეში", - განაცხადა ირაკლი ღარიბაშვილმა.