საქართველოს პრემიერმინისტრმა ბათუმში მიმდინარე თავდაცვისა და უსაფრთხოების კონფერენციაზე სიტყვით გამოსვლისას, თავდაცვის სფეროში მიმდინარე და დაგეგმილ რეფორმებზე ისაუბრა:

“საქართველოსა და ევროკავშირის ურთიერთობაში დაიწყო სრულიად ახალი ეტაპი. ამ დღიდან საქართველო საერთო ეროვნული თანხმობისა და საერთო ღირებულებების საფუძველზე საკუთარი მტკიცე და ურყევი ნებით ასოცირდება დიდ პოლიტიკურ და ეკონომიკურ კავშირთან. ამ შეთანხმებაზე ხელმოწერა, პირველ რიგში, ნიშნავს იმას, რომ შეუქცევადი ხდება ჩვენი ქვეყნის დემოკრატიული განვითარება, შეუქცევადი ხდება საქართველოს ევროინტეგრაციის პროცესი.

უსაფრთხოების ცვალებად გარემოში საქართველოსთვის დიდი მნიშვნელობა აქვს დასავლეთის მკაფიო პოლიტიკას. ჩვენთვის მეტად მნიშვნელოვანია, რომ დასავლეთი აქტიურად იყოს ჩართული რეგიონში მიმდინარე პროცესებში. საქართველოს მთავრობის მთავარი მიზანია თანამედროვე და თავდაცვისუნარიანი ძალების განვითარება დემოკრატიული კონტროლის ქვეშ და ამაში ჩვენ ძალიან დიდ ძალისხმევას ვდებთ.

მინდა განვაცხადო, რომ საქართველომ დაამტკიცა, რომ ის ერთგულად ემსახურება საერთაშორისო სტაბილურობისა და უსაფრთხოების განმტკიცების საქმეს და ნამდვილად შესწევს უნარი საკუთარი წვლილი შეიტანოს საერთო ევროატლანტიკური უსაფრთხოების განმტკიცების საქმეში,” – აღნიშნა პრემიერმა.