ხათუნა გოგალაძე გაეროს გარემოსდაცვითი ასამბლეის პირველ სესიას ხელმძღვანელობს

პოლიტიკა - 13:19, 28 Jun, 2014

704

კენიის დედაქალაქ ნაირობიში, გაერო-ს უმაღლესი დონის გარემოსდაცვითი ორგანოს - გარემოსდაცვითი ასამბლეის (UNEA) პირველი სესია იმართება.

საქართველოს გარემოს დაცვის დაცვის სამინისტროს ინფორმაციით, სესიას 162 წევრი ქვეყნის 1200-ზე მეტი წარმომადგენელი ესწრება, მათ შორის 62 გარემოს დაცვის მინისტრი.

ასამბლეაზე სპეციალური სტუმრის სტატუსით გაეროს გენერალური მდივანი პან გი მუნი და მონაკოს პრინცი ალბერტ II მონაწილეობენ.

ღონისძიებაზე საქართველოს დელეგაციას გარემოსა და ბუნებრივი რესურსების დაცვის მინისტრი ხათუნა გოგალაძე ხელმძღვანელობს, რომელიც გარემოსდაცვითი ასამბლეის მმართველი ორგანოს - ბიუროს ვიცე-პრეზიდენტად იქნა არჩეული. გაერო-ს 193 ქვეყნიდან ბიუროს წევრად 10 წარმომადგენელი ირჩევა. ხათუნა გოგალაძე აღმოსავლეთ ევროპას წარმოადგენს. ღონისძიების ფარგლებში საქართველოს დელეგაცია მონაწილეობას მიიღებს მაღალი რანგის ორმხრივ და მრავალმხრივ შეხვედრებში.

გაერო-ს გარემოსდაცვითი ასამბლეა წარმოადგენს გლობალური გარემოსდაცვითი პოლიტიკის მართვის პლატფორმას საკანონმდებლო, ფინანსური და განვითარების სფეროში. ასამბლეის შექმნა ისტორიული ნაბიჯია გლობალური გარემოს დაცვის სფეროში, რომელიც პასუხობს გარემოსდაცვით გამოწვევებს მშვიდობის, უსაფრთხოების, საფინანსო, სავაჭრო და ჯანდაცვის მიმართულებით. UNEA-ის ძირითადი საკითხები მოიცავს ველურ ბუნებაში უკანონო ვაჭრობის, გარემოსდაცვითი კანონმდებლობის უზენაესობის, მწვანე ეკონომიკის დაფინანსების, მდგრადი განვითარების მიზნებსა და 2015 წლის შემდგომი განვითარების დღის წესრიგს.