საქართველოს პრემიერმინისტრის ირაკლი ღარიბაშვილის განცხადებით ევროპასთან ასოცირების ხელშეკრულების გაფორმებით, ქართველ ბიზნესმენებს მიეცემათ საუკეთესო შესაძლებლობა და გამოცდილება, გაყიდონ საკუთარი პროდუქცია ევროპაში. ამის შესახებ ღარიბაშვილმა ტელეკომპანია „ბიბისი“-ს ეთერში ისაუბრა.

„აღფრთოვანებული ვარ, რადგან ეს ისტორიული დღეა, რადგან დღეს ჩვენ, ქართველებმა, ხელი მოვაწერეთ ასოცირების შეთანხმებას, ეს არის ქვეყნის მნიშვნელოვანი გეგმა ევროინტეგრაციისა და მოდერნიზაციისათვის. ეს არის ჩვენი მთავრობისა და ხალხის გადაწყვეტილება, ეს არის ოცნება, რომელიც რეალობად იქცა.

საუკუნეების განმავლობაში ვცდილობდით, ვყოფილიყავით ახლოს ევროპასთან და სწორედ ამიტომ ქართველებისთვის ეს დიადი დღეა. ხელი მოვაწერეთ თავისუფალი ვაჭრობის ხელშეკრულებას, რომელიც ასევე ძალიან მნიშვნელოვანია ჩვენი ქვეყნისთვის, საქართველოსთვის 500 მილიონიანი ბაზარი იხსნება.

ქართველ ბიზნესმენებს მიეცემათ საუკეთესო შესაძლებლობა და გამოცდილება, გაყიდონ საკუთარი პროდუქცია ევროპაში. მაშასადამე, ეს არის ძალიან დიდი გამოცდილება. ჩვენ ველოდებით, რომ ქვეყნის შიდა პროდუქტი 4,5%-ით გაიზრდება, გაიზრდება ექსპორტიც. ეს კი ქვეყნისთვის დიდი მოგების მომტანი იქნება. ეს რა თქმა უნდა არ მოხდება დღეს, ამას საკმაოდ დიდი მუშაობა სჭირდება. შედეგი თითოეულ ჩვენგანზეა დამოკიდებული, დამოკიდებული იმაზე, თუ როგორ და რამდენად სწრაფად მოვახდენთ რეფორმების იმპლემენტაციას. საბოლოო შედეგის მისაღწევად ჩვენ შეიძლება 5 წელი დაგვჭირდეს, ან უფრო მეტიც, ეს ჩვენზეა დამოკიდებული. ჩვენს მთავრობას აქვს მკაფიო გადაწყვეტილება ევროპული კურსის შესახებ და ევროინტეგრაციისკენ სვლა შეუქცევადი პროცესია. ეს არის ჩვენი გადაწყვტეილება, რომელსაც ქართველი ხალხი მხარს უჭერს“,- განაცხადა ღარიბაშვილმა.