ბაჩუკი ქარდავა: გილოცავთ!!!

სოც.მედია - 17:42, 27 Jun, 2014

2123

ეროვნულ-დემოკრატიული პარტიის თავმჯდომარე ბაჩუკი ქარდავა ევროკავშირთან ასოცირების ხელშეკრულების ხელმოწერის ფაქტს ,,ფეისბუქის“ გვერდზე ეხმაურება და საქართელოს მოსახლეობას ამ დღეს ულოცავს:

,,ჰაველი ევროკავშირის შესახებ ამბობდა, რომ ევროპა არის ბრწყინვალე მოდელი იმისა, როგორ უნდა იცხოვრონ და იღვაწონ სხვადასხვა ერებმა ერთად კეთილდღეობისთვის, პროგრესისა და მშვიდობისათვის ისე, რომ ამ მიზანს მსხვერპლად არ შეეწიროს რომელიმე მათგანის იდენტობა. ის აგრეთვე დიდ მნიშვნელობას ანიჭებდა და მიანიშნებდა იმ ერების პასუხისმგებლობაზეც, რომლებიც ისწაფვიან ევროკავშირისკენ: ,,ევროკავშირის წევრობა მარტო გარკვეული უფლებებისა და სარგებლობის მოპოვებას კი არა, არამედ საერთო ევროპული პასუხისმგებლობის გაზიარებასაც ნიშნავს”. ამ კონტექსტში ის სამთავრობო სტრუქტურებზე, პარლამენტსა და დემოკრატიულ ინსტიტუტებზე უპირატეს მნიშვნელობას სამოქალაქო საზოგადოებას ანიჭებდა.

სწორედ, რომ სამოქალაქო საზოგადოების ჩამოყალიბებაა ჩვენი უმთავრესი გამოწვევა. ასეთ საზოგადოებას არ ახასიათებს ბოღმა, გადაჭარბებული ემოციურობა საერთო ეროვნული მნიშვნელობის გადაწყვეტილებების მიღების დროს, პირიქით, ის სოლიდარობის და რაციონალიზმის მაღალი ხარისხით ხასიათდება და შესაბამისად, ცხვრის ფარად ქცევისა და სიყალბეებზე წამოგების წინააღმდეგ, ძლიერი იმუნიტეტით გამოირჩევა.

ნატო ჩვენთვის უსაფრთხოების გარანტიაა, ევროპა ჩვენი მენტალიტეტი, ჩვენი სახლი, საიდანაც ისტორიის უკუღმართობამ მოგვწყვიტა; რუსეთი ჩვენი მტერი, რომელმაც ეკლესიები შეგვიკირა, ენის წართმევა სცადა და ულამაზესი მიწები წაგვართვა.

ბევრი ალაპარაკდა 27 ივნისის მნიშვნელობაზე და ფრთხილად, მაგრამ მაინც ცდილობენ ამ ისტორიული დღის ნეგატივად წარმოჩენას, განსაკუთრებით ეკონომიკური თემების ყალბი მანიპულაციით. მათ დიდ დროს ნამდვილად ვერ დავუთმობ და მოკლედ ვუპასუხებ - ტყუილად ირჯებით, მხოლოდ არ ვიცი, ვის საამებლად, უფრო სწორად, ვხვდები და ეს არ არის ქართველი ერი. სამოქალაქო საზოგადოება, რაც ევროპულობის ერთ-ერთი მთავარი მახასიათებელია და ჩვენი მთავარი საზრუნავი, ქმნის თავისუფალ სივრცეს, კანონზე დაფუძნებულ სამართლიანობას, გამჭირვალე ეკონომიკას და თავისუფალ ბიზნეს, ეს ყველაფერი კი შესაბამისად აგროვებს დოვლათს.

ასე, რომ დღევანდელი დღე ამ გზაზე სიარულის უმნიშვნელოვანესი ეტაპია და მჯერა, თითქმის შეუქცევადი, რასაც გილოცავთ ყველას, უკლებლივ ყველას იმიტომ, რომ ყოველი ჩვენგანის შვილები იცხოვრებენ ევროპაში ანუ ენით, ტრადიციებით და ტერიტორიებით დაცულ თავისუფალ, ძლიერ და მდიდარ საქართველოში“, - წერს ბაჩუკი ქარდავა.