ექსპეტი სოსო ცისკარიშვილი ევროპასთან ასოცირების ხელშეკრულების ხელმოწერასთან დაკავშირებით კომენტარს აკეთებს და აღნიშნავს, რომ საქართველოს ძირითადი მიზანი არის გამოიყენოს ის ახალი შესაძლებლობები, რასაც ქვეყანას ასოცირების ხელშეკრულება აძლევს:

"არის კითხვა, რა სარგებელი იქნება ამ ხელმოწერით? თუ ჩვენ ვფიქრობთ, რომ ხვალ და ზეგ სულ ყველას გაგვევსება ჯიბეები ევროთი, რასაკვირველია, იმედგაცრუება იქნება გარდაუვალი. მაგრამ უნდა ვაცნობიერებდეთ, რომ ჩვენი ძირითადი მიზანი არის გამოვიყენოთ ყველა ის ახალი შესაძლებლობა, რასაც ვიღებთ ასოცირების ხელშეკრულებით. ეხება ეს დემოკრატიის ხარისხის უფრო მაღალ დონეზე აყვანას ქვეყანაში, ეხება ეს განათლების, ჯანდაცვის სისტემების უფრო მაღალ სტანდარტებს. ასევე, ეკონომიკური კუთხით ძალიან დიდი ასპარეზი ეძლევა ქართველ მეწარმეებს, თუ არ ვიზარმაცებთ, ვიქნებით კმაყოფილი, თუ ისევ პატრონის მოლოდინში და მის იმედად გვინდა დავრჩეთ, მაშინ უკმაყოფილება უფრო თვალსაჩინო იქნება. საფრთხე შეიძლება ის იყოს, რომ ჩვენ, თავად ვერ მოვახერხოთ ამ ახალი, უნიკალური შესაძლებლობის გამოყენება და გულგაცრუებული დავრჩეთ იმიტომ, რომ არავინ არ გვიკეთებს იმას, რისი მოლოდინიც გვაქვს", - აღნიშნა სოსო ცისკარიშვილმა.