„ნაციონალური მოძრაობის“ ერთ-ერთი ლიდერი გიგი უგულავა ევროკავშირთან ასოცირების ხელშეკრულების გაფორომებას საქართველოს ყველა ყოფილ მმართველს ულოცავს.

მისი თქმით, ასოცირების შეთანხმება დღევანდელ ხელისუფლებას „ზეციური მანანასავით დაეცა თავზე”.

„2003 წლის ვარდების რევოლუციის შემდეგ საქართველოში ყველა ადმინისტრაციულ შენობასა და სახელმწიფო დაწესებულებაზე აღიმართა ევროპის დროშა, მაშინ ბევრმა აღნიშნა, რომ ეს უტოპია იყო და რომ შეუძლებელია, საქართველო ჩამოყალიბდეს სრულფასოვან ევროპულ სახელმწიფოდ. გავიდა 10 წელი და ჩვენ დღეს ვაწერთ ხელს ასოცირების ხელშეკრულებას, რაც, პირველ რიგში, იმას ნიშნავს, რომ საქართველომ გაიარა გზაგასაყარი. საქართველომ უკვე გააკეთა არჩევანი და სხვა გზის შენაკადს აღარ დაადგება. ის დაადგება ერთადერთ გზას, ევროპისკენ მიმავალ გზას. მინდა, მივულოცო ეს დღე საქართველოს ყველა თაობის ხელმძღვანელს, ყველა პრეზიდენტს. მინდა, მივულოცო ეს დღე ზურაბ ჟვანიას, რომელმაც პირველად თქვა – მე ვარ ქართველი, მაშასადამე, მე ვარ ევროპელი. მე მინდა, ეს დღე მივულოცო მიხეილ სააკაშვილს, ზვიად გამსახურდიას, ედუარდ შევადრნაძეს და დღევანდელ მთავრობას, მიუხედავად ჩემი და ჩვენი დამოკიდებულებისა მათ მიმართ; მიუხედავად იმისა, რომ ერთგვარად ზეციური მანანასავით დაეცა ეს დიდი მისია მას თავზე, მინდა, ვუსურვო ხელისუფლებას, წარმატებით ზიდოს ეს მისია და საქართველო კიდევ უფრო დააახლოვოს ევროპულ ოჯახს. დიდი მადლობა იმ უსახელო გმირებს, რომელთა შრომასა და ჯაფაზე იდგა ის, რომ დღევანდელი დღე შემდგარიყო. მინდა, ვუსურვო წარმატება ჩვენს ქვეყანას ამ რთულ გზაზე, ეს გზა არ იქნება ადვილი, ეს იქნება რთული , მაგარმ ერთობლივი შრომით ამ გზას დავძლევთ და საქართველო დაბრუნდება იქ, სადაც არის მისი ადგილი– ერთიან ძლიერ ევროპაში“,–განაცხადა გიგი უგულავამ.