ფინანსთა მინისტრი საქართველოს მოსახლეობას ევროკავშირთან ასოცირების ხელშეკრულების გაფორმებას ულოცავს.

ნოდარ ხადურის თქმით, ეს მნიშვნელოვანი დღეა როგორც პოლიტიკური, ასევე ეკონომიკური თვალსაზრისით.

"მინდა მივულოცო საქართველოს ეს ისტორიული თარიღი. ეს მნიშვნელოვანი დღეა როგორც პოლიტიკურად, რადგან ხელი მოეწერა ევროკავშირთან ასოცირების ხელშეკრულებას, ასევე ეკონომიკური თვალსაზრისით. როგორც ცნობილია, ასოცირების ხელშეკრულების ნაწილია ღრმა და ყოვლისმომცველი თავისუფალი სავაჭრო სივრცის შესახებ შეთანხმება (DCETA), რომელიც ბევრ სიკეთეს ითვალისწინებს ქართული ბიზნესისთვის. საქართველო გახდება ევროპული ოჯახის წევრი და ერთობლივი ძალისხმევით, რაც შეიძლება სწრაფად, დადგენილი სტანდარტების შესაბამისად ჩვენი პროდუქციისთვის გაიხსნება ევროპული ბაზარი, შეიქმნება წინაპირობები ინვესტიციების გაზრდისთვის, რაც ქვეყნის აღმავლობის ერთ-ერთი საწინდარი იქნება", - აცხადებს ფინანსთა მინისტრი ნოდარ ხადური.