ხუდონის თაბაშირის საბადოსთან დაკავშირებით გარემოს დაცვის სამინისტრო განცხადებას ავრცელებს

პოლიტიკა - 20:50, 26 Jun, 2014

1732

გარემოსა და ბუნებრივი რესურსების დაცვის სამინისტრო ენგურის წყალსაცავის მიმდებარე ფერდობზე არსებული ხუდონის თაბაშირის საბადოსთან დაკავშირებულ მონიტროინგზე სპეციალურ განცხადებას ავრცელებს.

,,საზოგადოების მაღალი ინტერესიდან გამომდინარე, საქართველოს გარემოსა და ბუნებრივი რესურსების დაცვის სამინისტრო განმარტავს, რომ ენგურის წყალსაცავის მიმდებარე ფერდობზე არსებული ხუდონის თაბაშირის საბადოზე პერიოდულად, როგორც სხვა სალიცენზიო ობიექტებზეც, გარემოს ეროვნული სააგენტოს მიერ ხორციელდება ტერიტორიის ვიზუალური გეოლოგიური კვლევა.

გარემოსდაცვითი ზედამხედველობის დეპარტამენტის მოთხოვნის საფუძველზე ბოლო კვლევა სააგენტოს გეოლოგების მიერ 2014 წლის 16-17 ივნისს განხორციელდა. ამ ეტაპზე მასშტაბური მოპოვებითი სამუშაოები ლიცენზირებულ ფართობზე არ მიმდინარეობს.

გეოლოგების წინასწარი შეფასებით, ხუდონის თაბაშირის საბადოს ფარგლებში მეწყერული და ღვარცოფული პროცესები, რომლებსაც შეუძლიათ საფრთხე შეუქმნას ენგურჰესის წყალსაცავს არ შეინიშნება. აღნიშნული კვლევის შედეგებზე დაყრდნობით, გარემოს ეროვნული სააგენტოს მიერ დასკვნა წარმოდგენილი იქნება უახლოეს დღეებში. ამის შემდგომ დადგინდება, არსებობს თუ არა კომპლექსური გეოლოგიური კვლევის ჩატარების და გრძელვადიანი მონიტორინგის წარმოების აუცილებლობა, როგორც საბადოს ფარგლებში, ასევე წყალსაცავის ზონის მიმდებარე ფერდობებზე“, - ნათქვამია სამინისტროს განცხადებაში.