შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი სერგეი ლავროვის განცხადებას ეხმაურება.

მისი თქმით, რუსეთის საგარეო საქმეთა მინისტრის განცხადება მხოლოდ საქართველოს არ ეხება.

ზაქარეიშვილი რუსეთისგან საქართველოს სერიოზულ დაზარალებას არ ელოდება.

„რუსეთის საგარეო საქმეთა მინისტრის განცხადება იმ სახელმწიფოებს ეხება, ვინც ხვალ ასოცირების ხელშეკრულებას ხელს აწერს. ესენია უკრაინა, მოლდოვა და საქართველო. აქედან გამომდინარე, ეს ზოგადი განცხადებაა. ამ კონტექსტის გათვალისწინებით, რუსეთს ყველაზე ნაკლები რესურსები საქართველოს წინააღმდეგ აქვს, იმიტომ, რომ საქართველოს გონივრული და სწორი პოლიტიკის შედეგად, ჩვენ პრაქტიკულად რუსეთისგან დისტანცირებულები ვართ როგორც ეკონომიკურად, ისე პოლიტიკურად. ჩვენ არც დიპლომატიური ურთიერთობები გვაქვს. აქედან გამომდინარე, არ ველოდები, რომ რუსეთს შეუძლია საქართველო სერიოზულად დააზარალოს. თუმცა, ბუნებრივია, დღევანდელი განცხადებით ჩანს, რომ რუსეთს წარმოდგენები აქვს, თუ რა მოხდება ასოცირების ხელშეკრულების ხელმოწერის შემდეგ ეკონომიკური მიმართულებით“, - განაცხადა პაატა ზაქარეიშვილმა.

სერგეი ლავროვის თქმით, თუ ევროკავშირთან შეთანხმებას ნეგატიური შედეგები იქნება დსთ-ს თავისუფალი სავაჭრო ზონისთვის, რუსეთი კანონებით განსაზღვრულ თავდაცვით ზომებს მიიღებს.