მუხრან ბურჭულაძე: არჩევნებმა აჩვენა, რომ მთავრობას ხალხის არ ესმის

პოლიტიკა - 21:27, 25 Jun, 2014

1312

სამწუხაროა რომ მმართველი ძალა არჩევნებით კმაყოფილია, რადგან მთავრობის თვითკმაყოფილება ქვეყანას მძიმე შედეგებამდე მიიყვანს, რისიც არაერთი მაგალითი გვაქვს, არჩევნების შედეგები სახელისუფლებო პარტიის წარმომადგენლების მართლსაწინააღმდეგო ქმედებებით იქნა განპირობებული, რისთვისაც პასუხი არავინ აგო. ხალხი ხელისუფლებისგან მეტს მოითხოვდა და მას მთავრობამ იმედი გაუცრუა, ამომრჩეველთა უმრავლესობა უკმაყოფილოა და ეს არჩევნების შედეგებმაც ცხადყო და ვფიქრობ ხელისუფლების ლეგიტიმაციის ხარისხიც აჩვენა. მმართველმა ძალამ დაივიწყა რომ ქვეყანას ხალხი უნდა მართავდეს და რომ ამის ამბიცია ჩვენს საზოგადოებას რეალურად აქვს და ილუზიების დრო არ არის.

გარდამავალ პერიოდში სტანდარტები იზრდება, ხელისუფლება კი ძალაუფლების შენარჩუნებისთვის დემოკრატიისთვის ყოვლად მიუღებელ მეთოდებს მიმართავს. იქნებ გავიწყდებათ რა ხდება რევოლუციების მიზეზი. ცდებით თუ ფიქრობთ, რომ პროტესტის მისაღებად თორმეტწლიანი თმენაა საჭირო.

მოსახლეობის უმრავლესობა სოციალური პირობებით უკმაყოფილოა, მათი მოთხოვნის მინიმუმიც კი არ დაკმაყოფილებულა ორი წლის მანძილზე, იღებთ კანონებს, რომელსაც სასამართლო აუქმებს. რა პასუხს აძლევთ მოსახლეობას, როდესაც თქვენი გუნდის იდენტიფიკატორი მხოლოდ პრემიები და პირადი კეთილდღეობაა, როდესაც ხალხის პრობლემების მოგვარებაზე პრიორიტეტული და მათი არჩევანის დაცვაზე მნიშვნელოვანი თქვენი პირადი კომფორტია?

დღითი დღე ვრწმუნდებით, რომ სახელისუფლებო პარტიისთვის ძალაუფლება თვითმიზანია და არა საშუალება, საზოგადოება კი მეტს მოელოდა, რომ ხელისუფლება მიზნების რეალიზების პლათფორმა იქნებოდა მაგრამ ამაოდ. რეალურად თქვენ ხალხს მოპარეთ ხმები და წაართვით არჩევანის უფლება.

მინდა გითხრათ პროტესტი მწიფდება, ნუ ფრთხებით და გაკვირვებულ თვალებს ნუ აცეცებთ ამის გაგონებაზე, ნურც სადმე ეძებთ პროვოკაციას - ეს ბუნებრივი პროცესია და მიზეზი თქვენს თავში ეძებეთ. არჩევნებმა აჩვენა, რომ მთავრობას ხალხის არ ესმის. იქნებ ეს ნაძალადევი შედეგი გახდეს ჭკუის სასწავლებელი და საკუთარ ამომრჩეველს მაინც მოუსმინოთ.

მინდა გითხრათ, რომ შორს არაა ის დღე, როდესაც მოიმკით იმას რასაც სთესთ.

მუხრან ბურჭულაძე

,,დემოკრატიული განვითარების ეროვნული ცენტრის“ ხელმძრვანელი