საქართველოს იუსტიციის მინისტრი თეა წულუკიანი პორტუგალიელ კოლეგას შეხვდა. შეხვედრაზე საუბარი შეეხო ასოცირების ხელშეკრულების ხელმოწერის მნიშვნელობას. საქართველოს იუსტიციის მინისტრმა პორტუგალიას ჩვენი ქვეყნის მხარდაჭერისათვის მადლობა გადაუხადა.

"ასოცირების ხელშეკრულების ხელმოწერა ისტორიული ფაქტია საქართველოსთვის და მადლობას ვუხდით პორტუგალიის მთავრობას, რომელიც მრავალი წელია, მიესალმება ახალი ქვეყნების მისწრაფებას ევროკავშირისკენ და ყოველთვის ხაზგასმით უჭერს მხარს საქართველოს ტერიტორიულ მთლიანობას, საქართველოს დევნილთა შესახებ რეზოლუციებს გაერო-ში", − განაცხადა თეა წულუკიანმა.

შეხვედრაზე საუბარი შეეხო ორ ქვეყანას შორის სასამართლო და სამართლებრივ სფეროებში თანამშრომლობის საკითხებსაც. თეა წულუკიანი და პაულა ტექსეირა და კრუზი სამინისტროებს შორის თანამშრომლობის პროტოკოლის გაფორმებაზე შეთანხმდნენ. თეა წულუკიანმა პაულა ტექსეირა და კრუზს დოკუმენტზე ხელმოწერა შემოდგომაზე თბილისში შესთავაზა.

მინისტრებმა იმსჯელეს ნარკოდანაშაულის წინააღმდეგ ბრძოლის საკითხებზე, არასრულწლოვანთა მართლმსაჯულებისა და დავების გადაჭრის ალტერნატიული მექანიზმების შესახებ.

საქართველოს იუსტიციის მინისტრის განცხადებით, ქვეყანაში ანტინარკოტიკული პოლიტიკის კუთხით ისეთი ცვლილებები უნდა გატარდეს, რაც პორტუგალიამ წლების წინ განახორციელა. კერძოდ, ის უნდა დაეფუძნოს ნარკოტიკული ნივთიერებების გამსაღებლებისადმი რეპრესიულ მიდგომას; მომხმარებელთა მკურნალობა-რეაბილიტაციასა და ნარკოდანაშაულის პრევენციას არასრულწლოვნებში. ორი ქვეყნის იუსტიციის მინისტრებმა არასრულწლოვანთა მართლმსაჯულებისა და დავების გადაჭრის ალტერნატიული გზების შესახებაც ისაუბრეს.