„ბევრს გული სწყდება MAP –ის არ მინიჭების გამო, მაგრამ საქართველო ნამდვილად უახლოვდება ნატო-ს“, - ამის შესახებ ნატო-ს გენერალური მდივნის სპეციალურმა წარმომადგენელმა სამხრეთ კავკასიასა და ცენტრალურ აზიაში, ჯეიმს აპატურაიმ, სოციალურ ქსელ "ფეისბუქში", საკუთარ გვერდზე დაწერა.

"ჩემი აზრით, ორი საკითხია მნიშვნელოვანი: პირველი ის, რომ უელსის სამიტზე წარმოვადგენთ უპრეცედენტო პაკეტს, რომლის მეშვეობითაც საქართველო ნატო-ს უფრო სიღრმისეულად დაუკავშირდება, ვიდრე ოდესმე ნატო-ს რომელიმე არაწევრი ქვეყანა.

მეორე - ჩვენ მაინც უნდა დავიწყოთ მოლაპარაკებების წარმოება სამიტის კომუნიკეს შესახებ, რომელიც, ჩემი ღრმა რწმენით, განამტკიცებს ბუქარესტის ვალდებულებას, რომ საქართველო გახდება ალიანსის წევრი. აგრეთვე, ცხადყოფს იმ პროგრესს, რომელიც საქართველომ მიაღწია ნატო-სკენ მიმავალ გზაზე. ვიცი, რომ ბევრს გული სწყდება ,,MAP""-ის არ მინიჭების გამო, მაგრამ საქართველო ნამდვილად უახლოვდება ნატო-ს. შესაძლოა, მისი ნაბიჯები მკვეთრი და უზარმაზარი არ არის, თუმცა - მტკიცე ტემპით გამოირჩევა. ეს ყოველივე საქართველოს ძველი და ახლანდელი მთავრობის გულმოდგინე მუშაობის და კარგი დიპლომატიის შედეგია", - წერს აპატურაი.