მთავარია შევინარჩუნოთ სტრატეგიული სიმშვიდე, არ წამოვეგოთ პროვოკაციებს

მთავარია შევინარჩუნოთ სტრატეგიული სიმშვიდე, არ წამოვეგოთ პროვოკაციებს - ალექსი პეტრიაშვილი

პოლიტიკა - 15:03, 25 Jun, 2014

1500

ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა, ალექსი პეტრიაშვილმა ჟურნალისტებს განუცხადა, რომ კვლევის მიხედვით, ევროკავშირთან ასოცირების ხელშეკრულების ხელმოწერიდან უმოკლეს პერიოდში ეკონომიკა 4,3%-ით, ხოლო ექსპორტი 12%-ით გაიზრდება.

"ეს ძალიან მნიშვნელოვანი და შთამბეჭდავი რიცხვია. თუმცა, ეს არის იმის გაუთვალისწინებლად, თუ რა მასშტაბის და მოცულობის ინვესტიცია შეიძლება შემოვიდეს ქვეყანაში. მინდა გითხრათ, რომ ყველა ჩვენს საერთაშორისო შეხვედრაზე, საერთაშორისო კონფერენციებსა თუ ორმხრივ შეხვედრებზე არის ბუმი, დიდი ინტერესი ევროპელი და არა მხოლოდ ევროპელი ინვესტორების მხრიდან. ისინი ძალიან სერიოზულად ელოდებიან ასოცირების ხელშეკრულების ხელმოწერას", - განაცხადა პეტრიაშვილმა.

რაც შეეხება კითხვას, თუ რამდენად აქვს ხელისუფლებას გააზრებული ის საფრთხეები, რომელიც შეიძლება ასოცირების ხელშეკრულების ხელმოწერის შემდეგ დაემუქროს ქვეყანას რუსეთისგან, ალექსი პეტრიაშვილის განცხადებით, გამოწვევები ყველანაირი ტიპის შეიძლება იყოს.

"შეიძლება ეს იყოს ეკონომიკური ხასიათის გამოწვევები, ნაკლებად სავარაუდოა, რომ ეს პირდაპირი ტიპის სამხედრო კონფრონტაცია იყოს. ჩვენ ყველაფერს ვაკეთებთ იმისთვის, რომ თავი ავარიდოთ შემდგომ ესკალაციას რეგიონში. ისედაც დაძაბულია ვითარება, როდესაც შენი ქვეყნის ტერიტორიების 20% არის ოკუპირებული რუსეთის შეიარაღებული ძალების მიერ.

ჩვენ გვაქვს საპასუხო რეაქციები, გეგმები ევროპელ პარტნიორებთან, ევროკავშირთან ერთად. მთავარია შევინარჩუნოთ სტრატეგიული სიმშვიდე, არ წამოვეგოთ პროვოკაციებს, გავაგრძელოთ ეკონომიკური და დემოკრატიული ინსტიტუტების აღმშენებლობა", - განაცხადა ალექსი პეტრიაშვილმა.