ინფორმაციის თავისუფლების განვითარების ინსტიტუტი (IDFI) 2013 წელს სხვადასხვა საჯარო დაწესებულებებში პრემიების გაცემასთან დაკავშირებით ინფორმაციას ავრცელებს.

მათი ინფორმაციით, ეროვნული უშიშროების საბჭოს აპარატის თანამდებობის პირებზე 2013 წელს პრემიის სახით სულ გაცემულია 148 990 ლარი.

უშიშროების საბჭოს ყოფილ მდივანს გიგა ბოკერიას 2013 წელს (იანვარი-ნოემბერი ) მიღებული აქვს 30 400 ლარის ოდენობის პრემია, ხოლო ირინე იმერლიშვილმა დეკემბრის თვეში პრემიის სახით მიიღო 3 540 ლარი.

2013 წელს უშიშროების საბჭოს აპარატის თანამდებობის პირების მიერ ქვეყნის გარეთ განხორციელებულ ოფიციალურ და სამუშაო ვიზიტებზე დახარჯულია 99 485.25 ლარი, აღნიშნული თანხიდან 59 456 ლარი შეადგენს გიგა ბოკერიას სამივლინებო ხარჯებს.

IDFI ასევე სახალხო დამცველის აპარატში გაწეულ ხარჯებზეც წერს. 2013 წელს სახალხო დამცველის მიერ ქვეყნის გარეთ განხორციელებულ 10 ოფიციალურ და სამუშაო ვიზიტზე 8 937.95 ლარი დაიხარჯა, მის „როუმინგულ“ მომსახურებაზე კი 11 808.43 ლარი. სახალხო დამცველის აპარატის მიერ გასულ წელს გაწეულმა წარმომადგენლობითმა ხარჯმა შეადგინა 17 391 ლარი.