საქართველოს საგარეო საქმეთა მინისტრ მაია ფანჯიკიძის განცხადებით, ნატო-ს გენერალური მდივანი ეთანხება იმ მოსაზრებას, რომ საქართველოს მიერ მიღწეული პროგრესი ადეკვატურად უნდა იყოს ასახული ნატო-ს მხრიდან. ამის შესახებ ფანჯიკიძემ ანდერს ფოგ რასმუსენთან შეხვედრის შემდეგ განაცხადა. თავად გენერალურ მდივანს კი კომენტარი არ გაუკეთებია.

„ჩვენს შეხვედრაზე ხაზი გავუსვი, რომ გვაქვს ჩვენი პროგრესის ადეკვატური ასახვის მოლოდინი და უფლება, რომ ეს მოლოდინი გვქონდეს და რომ ინტეგრაციის გზაზე გადადგმული ნაბიჯი ჩვენთვის მნიშვნელოვანია. გენერალური მდივანი აბსოლუტურად ეთანხმება ამ პოზიციას, იმას, რომ საქართველომ ძალიან ბევრი რამ გააკეთა ამ პერიოდის განმავლობაში, მან მომილოცა წარმატებით ჩატარებული არჩევნები, ასევე ევროკავშირთან ასოცირების ხელშეკრულების ხელმოწერა, რომელიც პარასკევს გაიმართება და, ასე ვთქვათ, ყველაფერ ამაში დაინახა ის პროგრესი, რომელსაც საქართველომ მიაღწია და ეთანხმება იმ მოსაზრებას, რომ ეს პროგრესი ადეკვატურად უნდა იყოს ასახული ნატო-ს მხრიდანაც“,- განაცხადა მაია ფანჯიკიძემ.