იურიდიულ საკითხთა კომიტეტის თავჯდომარე ვახტანგ ხმალაძე ბრძანებულებას, რომელიც პრეზიდენტის მიერ შექმნილი სსიპ-ების მთავრობის მიერ ხელახლა დამტკიცებას ეხება, სხვადასხვა კანონების კონსტიტუციასთან შესაბამისობაში მოყვანით ხსნის.

მისი თქმით, ახალი კონსტიტუციით საჯარო სამართლის იურიდიული პირების კონტროლი პრეზიდენტის უფლებამოსილება არ არის და ეს უფლებამოსილება, რომელიმე სხვა უწყებას უნდა გადასცემოდა.

„გასული წლის ნოემბრამდე, სანამ ახალი კონსტიტუცია ამოქმედდებოდა და პრეზიდენტი ფიცს დადებდა, პრეზიდენტის უფლებამოსილებები განისაზღვრებოდა კონსტიტუციით და უმარავი სხვა კანონით. ზოგიერთი ასეთი კანონით პრეზიდენტს ჰქონდა უფლებამოსილება, დაეფუძნებინა საჯარო სამართლის იურიდიული პირები, 2010 წელს კონსიტუცაში შეიტანეს ცვლილებები, რომლებიც ამოქმედდა ახალი პრეზიდენტის არჩევის შემდეგ. ამ კონსტიტუციით განისაზღვრა, რომ პრეზიდენტის უფლებამოსილებები განისაზღვრება მხოლოდ კონსტიტუციით და არცერთი სხვა კანონით.

კონსტიტუციაში აღარ წერია პრეზიდენტის უფლებამოსილება, დააფუძნოს საჯარო სამარლის იურიდიული პირი, ვინც აფუძნებს, მერე თავადვე აქვს ამ სსიპ-ების კონტროლის უფლება, ასეთი კონტროლის უფლება კი კონსტიტუციაში აღარ წერია. 2013 წლის შემოდგომაზე ჩვენ დაგვჭირდა 150-მდე კანონში ცვლილებების შეტანა, რომელიც ამოქმედდებოდა პრეზიდენტის მიერ ფიცის დადებიდან და რომლითაც პრეზიდენტს ბევრი უფლებამოსილება გაუქმდა. ერთ-ერთი არის ეს სსიპ-ების გაუქმებაც“,- განაცხადა ხმალაძემ.