საპარლამენტო უმრავლესობის წევრი დავით ლორთქიფანიძე „ალიასთან“ საუბარში მორიგ სკანდალურ განცხადებებს აკეთებს. ლორთქიფანიძე საუბრობს იმაზე, თუ რა პრობლემებმა იჩინა თავი ადგილობრივი არჩევნების შემდეგ:

„ამ გადასახედიდან ვფიქრობ, რომ არჩევნები დემოკრატიულად ჩატარდა, მაგრამ უნდა დავფიქრდეთ იმაზე, თუ რატომ არ მოვიდა მოსახლეობა არჩევნებზე. ახლა რაც არ უნდა ვთქვათ და თავი ვიმართლოთ, ეს დამაფიქრებელი ფაქტია. ხალხი რაღაც-რაღაცებზე გაბრაზდა იმიტომ, რომ ამ ხალხს ბევრი რამე კარგად ვერ გავაგებინეთ. ჩემი აზრით ბატონ ირაკლი ღარიბაშვილს ბევრად მეტი ყურადღების დათმობა მოუწევს პარტიის შიდა საქმეებისთვის, ვიდრე აქამდე აკეთებდა. აქამდე ის ცალსახად უჯერებდა ზოგიერთ შინაურს, რომელიც აწვდიდა ინფორმაციას, თითქოს ყველაფერი არის კარგად, მშვენივრად და ლამაზად, ფაქტია ეს ასე არ აღმოჩნდა.

მაგალითად საზოგადოებაში არასასიამოვნო რეაქცია გამოიწვია, როცა დავით ნარმანიას გამარჯვება ნაადრევად აღინიშნა, ვიღაც არწმუნებს პრემიერმინისტრს, რომ ყველაფერი არის იდეალურად. ხალხზე ამან კარგად არ იმოქმედა.

სოსო ჯაჭვლიანი არ არის საპარლამენტო უმრავლესობის რიგითი წევრი, ის არის ფრაქცია „ქართული ოცნების“ თავმჯდომარის მოადგილე. როდესაც ფრაქციის თავმჯდომარის მოადგილე აკეთებს განცხადებას, რომ კოალიციაში ადამიანობის ფაქტორი მოიკოჭლებს, არ არის გუნდურობის განცდა, პრემიერმინისტრის გარემოცვაში არიან ვიღაცები, რომლებიც ფუთფუთებენ, მე ვფიქრობ, ეს სერიოზული განსჯის საგანია“, - აცხადებს ლორთქიფანიძე.