თავდაცვის ყოფილი მინისტრი თენგიზ კიტოვანი „ნიუპოსტთან“ საუბარში პრემიერ-მინისტრ ირაკლი ღარიბაშვილის იმ განცხადებას გამოეხმაურა, სადაც ღარიბაშვილმა აღნიშნა, რომ მისვთის გაუგებარია თუ რატომ დადის თენგიზ კიტოვანი ქალაქში თავისუფლად. „ნიუპოსტი“ დაინტერესდა აპირებს თუ არა ყოფილი მინისტრი პოლიტიკურ აქტიურობას. გთავაზობთ მცირე ინტერვიუს:

აპირებთ თუ არა პოლიტიკურ აქტიურობას საქართველოში?

მე საერთოდ არ ვაპირებ აქციების მოწყობას, იმიტომ რომ ჩემს ინტერესებში არ შედის. თუ დაუსჯელობის კანონი არ გამკაცრდება მაშინ შეიძლება ყველაფერი გავაკეთოთ... 320 ათასი კაცი დაპატიმრებული ჰყავდათ გამოშვებული, ეს არ არის ხუმრობა... კომუნისტებს არ ჰყავდათ ამდენი, 35-36 ათასი პატიმარი ჰყავდათ მხოლოდ, ამათ კიდევ 320 ათასი ჰყავდათ დაპატიმრებული, გაძარცვული და გამოშვებული, ვინ უნდა აგოს მაზე პასუხი? ამაზე პასუხი სააკაშვილის რეჟიმმა უნდა აგოს და იმ შემსრულებლებმა, რომლებიც ამას ასრულებდნენ..

ვისი იმედი გაქვთ, რომელი პოლიტიკური პარტიის..

მე პოლიტიკაში არ ვერევი, მე ჯერ-ჯერობით მხარს ამ მთავრობას ვუჭერ, თუ მთავრობამ არ მიიღო რადიკალური ზომები და არ დაიწყო ამათი დაპატიმრებები ან პასუხისგებაში მიცემა, მაშინ ჩვენ ვერ დავიჯერებ ამ მთავრობისას ვერაფერს..

რამდენიმე კვირის წინ თქვენ პრემიერმა გახსენათ, ციტირებას მოვიყვან: „ძალიან თავისუფლად დადის ახლა, რა უნდა ამ კაცს არ ვიცი, რას დადის მე ვერ გამიგია", როგორ გაიგეთ მისი ეს განცხადება?

მე სანამ პრემიერს გავცემდე პასუხს, მე მაგაზე უფროსი ვარ, აქამდე დავდიოდი ქალაქში და სადაც მინდოდა იქ მივდიოდი და მოვდიოდი... 10 წელი ქალაქში არ შემომიშვა მიშას პოლიტიკამ, ახლა მე თავისუფლად შემიძლია..მაგათ შეუძლიათ ამიკრძალონ სიარული და მაშინ დამიჭირონ, აბა რა ვქნა ჭრელო პეპელა ნურც აქეთ გაფრინდები, ნურც იქითო..

თქვენ მისი ეს განცხადება სერიოზულად არ აღგიქვამთ?

მე რა უნდა ვუთხრა ახალგაზრდა კაცია, თავის სამშობლო უყვარს და ცდილობს ხალხისთვის ყველაფერი გააკეთოს, წესიერი კაცია.. არ არის ის ადრე რომ იყვნენ პრემიერმინისტრები ისეთი. ჩემს დროს იყო თენგიზ სიგუა წესიერი კაცი და ასეთია ესეც.

ე.ი. ირაკლი ღარიბაშვილი თენგიზ სიგუას გაგონებთ?

კი, ის იყო წესიერი და ახლა ვთვლი, რომ ირაკლი ღარიბაშვილია წესიერი კაცი.