საქალაქო სასამართლოში თბილისის ყოფილი მერის გიგი უგულავას უფლებამოსილების აღდგენის საქმეზე განხილვა გაგრძელდება. როგორც უგულავამ პროცესის დაწყებამდე განაცხადა, დღეს გამოჩნდება არის თუ არა სასამართლოს ორგანიზებულ გარიგებაში მთავრობასთან და პროკურატურასთან.

"საზოგადოებისთვის ცნობილია, რომ უკანასკნელი თვენახევრის განმავლობაში პროკურატურა არ ცხადდება ჩემს სასამართლო პროცესზე. დღეს, ჩემი ინფორმაციით, პროკურატურა გამოცხადდება, მაგრამ საქმე ექნება მომდევნო ფარსს და მე იმედს ვიტოვებ, რომ სასამართლო ამ ფარსში მონაწილეობას არ მიიღებს. კერძოდ, პროკურატურა ჩვენს შუამდგომლობაზე საპასუხოდ, რომელიც ჩემს თანამდებობაზე აღდგენას ეხება, დააყენებს შუამდგომლობას, რომ საქალაქო სასამართლოს და ამ მოსამართლის განსახილველი ეს თემა არ არის და მოითხოვს, ეს საკითხი გადამისამართდეს საოლქო სააპელაციო სასამართლოში. საოლქო სააპელაციო სასამართლოს კანონით აქვს შემდეგ ორი კვირა ვადა, რომ განიხილოს - მიიღოს თუ არა ეს საჩივარი და შესაბამისად, შემდეგ ერთი კვირა. სულ, ჯამში გამოდის სამი კვირა იმისათვის, რომ ეს შუამდგომლობა განიხილოს. დღეს სასამართლოსთვის იქნება ტესტი თავისუფლებაზე," - განაცხადა უგულავამ.