"სტაიანშჩიკი" გოგონა დიდ ოჯახზე ოცნებობს

პოლიტიკა - 09:39, 23 Jun, 2014

1841

კინოთეატრ "რუსთაველთან" უკვე 2 წელია, "სტაიანშჩიკი" გოგონა, 20 წლის ნინო სოლოღაშვილი ყოველდღე მიდის და მისი სამუშაო დღეც იწყება. იქ მცხოვრებლები თუ გამვლელები კარგად იცნობენ და ზოგთან მეგობრობს კიდეც:

- ბავშვობაში ვმათხოვრობდი, "სტაიანშჩიკობა" ორი წლის წინ დავიწყე. ჩემი მეგობარი მუშაობდა და ის დამეხმარა. ახლა ავად არის, მაგრამ როცა დაბრუნდება, ერთად ვიმუშავებთ. მათხოვრობას მუშაობა მირჩევნია.

- მშობლები გყავს?
- მხოლოდ დედა, რომელიც გათხოვილია და რაჭაში ცხოვრობს. და-ძმა არ მყავს. აქ მარტო ვცხოვრობ და ტელეფონით ველაპარაკები ხოლმე დედიკოს. ძალიან მენატრება, მაგრამ ექიმმა ამიკრძალა იქ წასვლა. კუჭის პრობლემა მაქვს და მგზავრობას ვერ ვიტან, ცუდად ვხდები... მადლობა ღმერთს, ბინის ქირაობის საშუალება მაქვს. როცა მიჭირდა, ქაშვეთის ტაძრის მოძღვრები მეხმარებოდნენ, ახლაც მეხმარებიან...

- მათხოვრობა როდიდან დაიწყე?
- 9 წლიდან სიონის ტაძართან ვმათხოვრობდი... ყველა თბილად მექცეოდა, თუმცა, ზოგჯერ შეურაცხყოფასაც მაყენებდნენ...

- გიქურდია?
- არასოდეს. ღმერთის მეშინოდა...

- რა რეაქცია აქვთ, როდესაც "სტაიანშჩიკ" გოგოს გხედავენ?
- ვინც პირველად მხედავს, ძალიან უკვირს, - "სტაიანშჩიკი" გოგო არ გვინახავსო... უკვე ბევრი მცნობს, ფულსაც მჩუქნიან და თბილადაც მექცევიან. ერთხელ ბიჭი და გოგო იყვნენ, ქუდი მეფარა და ბიჭმა მკითხა: გოგო ხარ თუ ბიჭიო? გოგო ვარ-მეთქი... არ დაიჯერა და მეგობარ გოგონას დაენაძლევა. ქუდი რომ მოვიხადე, მიხვდა, წააგო...

- შეყვარებული არ გყავს?
- არა. დავფიქრებულვარ ოჯახის შექმნაზე, მაგრამ სერიოზულად - არა. წერა-კითხვა არ ვიცი, ახლა ვსწავლობ. მინდა კარგად ვისწავლო. ცოტა დანაზოგსაც ვაკეთებ, რომ სამომავლოდ ნორმალური ოჯახი შევქმნა. პირადობის მოწმობაც არ მაქვს, ახლა მიკეთებენ, მომსახურების სააგენტოს სოცმუშაკი მეხმარება, მალე ავიღებ. შემპირდნენ, როდესაც პირადობა მექნება, გამწვანებაში დამაწყებინებენ მუშაობას. დავიღალე, ნორმალური ცხოვრება მინდა. ერთი შეხედვით ჩანს ჩემი საქმე იოლი, მაგრამ ძალიან დავიღალე, სიმშვიდე მინდა.

- ნინო, რაზე ოცნებობ?
- სულ ბავშვებს ვნახულობ სიზმარში. ძალიან მიყვარს პატარები და მინდა ბევრი შვილი გავაჩინო. ვოცნებობ დიდ ოჯახზე, მინდა ჩემს ყველა შვილს უმაღლესი განათლება მივცე. არ მინდა ისეთი გაჭირვება გამოიარონ, რაც მე გავიარე. ყველაფერს გავაკეთებ, რომ ჩემი შვილები ბედნიერები იყვნენ...

P.S. კიდევ ბევრი ვისაუბრეთ მე და ნინომ. წამოსვლა აღარ მინდოდა. მსურდა კიდევ ბევრი ელაპარაკა, რადგან მისი ყველა სიტყვა საოცრად გულწრფელი იყო. დარწმუნებული ვარ, ნინო ბევრი შვილის ბედნიერი დედა იქნება, ის ამას ნამდვილად იმსახურებს.

წყარო: კვირის პალიტრა